Main Menu

જિલ્‍લા વહીવટીતંત્ર દ્વારા અમરેલીમાં આંતરરાષ્‍ટ્રીય પતંગ મહોત્‍સવ ઉજવાયો

પતંગ ઉડાડવાની કળા-સંસ્‍કૃત્તિનું આદાન-પ્રદાન એટલે આંતરરાષ્‍ટ્રીય પતંગ મહોત્સવ – સાસંદ નારણભાઇ કાછડીયા

અમરેલી ખાતે જિલ્‍લા વહીવટીતંત્ર દ્વારા આયોજિત આંતરરાષ્‍ટ્રીય પતંગ મહોત્‍સવ યોજાયો હતો. સાસંદશ્રી નારણભાઇ કાછડીયા, કલેકટરશ્રી સંજય અમરાણી તેમજ ગુજકોમાસોલના ચેરમેનશ્રી દિલીપભાઇ સંઘાણી સહિતના મહાનુભાવોએ દીપપ્રાગટ્ય કરી કાર્યક્રમને ખૂલ્‍લો મૂક્યો હતો. સાસંદશ્રી નારણભાઇ કાછડીયાએ પ્રાસંગિક પ્રવચન કરતા કહ્યું કે, ઉત્તરાયણ એ બાળકો થી માંડી વૃધ્‍ધ સુધીના તમામ માટેનું પર્વ છે. પતંગ ઉડાડવાની કળા-સંસ્‍કૃત્તિનું આદાન-પ્રદાન એટલે આંતરરાષ્‍ટ્રીય પતંગ મહોત્સવ. પતંગ પાસેથી એ શીખ મળે છે કે કુશળતા અને સાહસથી આકાશમાં ઉડવા મળે તેટલું વિશાળ ફલક મળે છે. ગુજરાત પ્રવાસન નિગમ અને અમરેલી જિલ્‍લા વહીવટીતંત્ર દ્વારા યોજવામાં આવેલ આ કાર્યક્રમમાં અમરેલી કલેકટરશ્રી સંજય અમરાણીએ શાબ્‍દિક સ્‍વાગત કર્યુ હતુ. કલેકટરશ્રી અમરાણીએ જણાવ્યું કે, પતંગ મહોત્સવના માધ્‍યમથી કૌશલ્‍યનો યોગ્ય ઉપયોગ થાય અને રોજગારીનું સર્જન થાય તેવો રાજય સરકારનો ઉદ્દેશ્ય છે. ઉત્તરાયણ એ આનંદનું પર્વ છે. પતંગ મહોત્‍સવની ઉજવણીથી ગુજરાત પ્રવાસનને વૈશ્વિક ફલક-નકશા પર સ્‍થાન મળ્યું છે. તેમણે ગુજરાત, અમરેલી, ગીર, એશિયાટિક સિંહ, દરિયાઇ વિસ્‍તાર સહિતની ખાસિયતોને આવરી લઇ પતંગબાજોને વિસ્‍તારનો પરિચય આપ્‍યો હતો.પૂર્વ કૃષિમંત્રીશ્રી દિલીપભાઇ સંઘાણીએ પ્રાસંગિક પ્રવચન કરી રાજય સરકાર દ્વારા સમગ્ર રાજયમાં ઉજવાતા પતંગ મહોત્‍સવની સફળતા ઇચ્‍છી હતી. વિદેશથી અને અન્‍ય રાજયોમાંથી આવેલા પતંગબાજોને કુમકુમ તિલક, પુષ્‍પગુચ્‍છથી પારંપારિક રીતે સ્‍વાગત કરવામાં આવ્‍યું હતુ. અમરેલી જિલ્‍લા વહીવટીતંત્ર દ્વારા પતંગબાજોને મેમેન્‍ટો આપવામાં આવ્‍યા હતા. અમરેલી સ્‍થિત કમાણી ફોરવર્ડ હાઇસ્‍કુલ મેદાન ખાતે રાખવામાં આવેલ આ કાર્યક્રમમાં કમ્‍બોડિયા, કોરિયા, ઇસ્‍ટોનિયા, લેબેનોન, મલેશિયા, નેધરલેન્‍ડ, તુર્કી, સિંગાપોર, સ્‍વીટર્ઝલેન્‍ડ, ઇઝરાયેલ, બ્રાઝિલ સહિત દેશના તેમજ મહારાષ્ટ્ર, કર્ણાટક, કેરળ તેમજ પશ્ચિમ બંગાળ સહિતના રાજયોના અંદાજે ૫૦ જેટલા પતંગબાજો અવનવા અને રંગબેરંગી પતંગો અમરેલીના આકાશમાં ઉડાડી મનોરંજન કર્યુ હતુ. કેતન મહેતા તેમજ તેમના ગ્રુપ અને શાળાના વિદ્યાર્થીનિઓએ દાંડિયા રાસ અને ગરબા સહિતના પારંપારિક સાંસ્‍કૃત્તિક રજૂ કરતા લોકનૃત્‍ય કર્યા હતા. આ પ્રસંગે પતંગબાજોને પ્રોત્‍સાહિત કરવા તેમજ આ કાર્યક્રમને નિહાળવા નગરપાલિકા પ્રમુખશ્રી અલ્‍કાબેન ગોંડલિયા, જિલ્‍લા વિકાસ અધિકારીશ્રી યોગેશ નિરગુડે, અધિક જિલ્લા મેજીસ્‍ટ્રેટશ્રી ભટ્ટ, નાયબ માહિતી નિયામકશ્રી બી.એસ. બસીયા, જિલ્‍લા ખેતીવાડી અધિકારીશ્રી
પટેલ, નાયબ જિલ્‍લા વિકાસ અધિકારીશ્રી માંકડ, નાયબ જિલ્‍લા પોલીસ અધિકારીશ્રી દેસાઇ, અમરેલી-વડીયા- કુંકાવાવ પ્રાંત અધિકારીશ્રી સતાણી, પ્રવાસન નિગમના શ્રી અતુલ ભટ્ટ, જિલ્‍લા રમતગમત અધિકારીશ્રી વસાવા, મામલતદારશ્રી અમે.સી. જાદવ, અમરેલી નગરપાલિકા ચીફ ઓફિસરશ્રી વસાવા, અમર ડેરી ચેરમેનશ્રી અશ્વિનભાઇ સાવલિયા, શ્રી કૌશિકભાઇ વેકરીયા, અમરેલી જિલ્‍લા ભાજપ પૂર્વપ્રમુખ શ્રી ડૉ. કાનાબાર સહિત પદાધિકારીશ્રી-અધિકારી- કર્મચારીશ્રીઓ અમરેલીના નગરજનો ઉપસ્‍થિત રહ્યા હતા. સમગ્ર કાર્યક્રમનું સંચાલન શ્રી પ્રકાશભાઇ જોષીએ કર્યુ હતુ.