Main Menu

ઉનાળા પહેલા જ ગીરની નદીઓ સુકાઈ, વન્યજીવોને પહોંચાડાયુ પાણી

ઉનાળાની જેમ જેમ ગરમી પડતી જાય છે તેમ તેમ કુદરતી પાણીના સ્ત્રોતો પણ સુકાઈ રહ્યાં છે. ત્યારે ગીર તથા બોર્ડર ઉપર વસવાટ કરતા હજારો વન્યજીવો માટે વનવિભાગ દ્વારા બનાવામાં આવેલા કૃત્રિમ પાણીના પોઈન્ટ્સમાંથી પોતાની તરસ છીપાવી રહ્યાં છે. તેમજ વનવિભાગ દ્વારા વન્ય પ્રાણીઓનીપાણીની તરસ છીપાવવા માટે ટેંકરો, સોલાર પંપસેટ દ્વારા પાણીની કુંડીઓ ભરવામાં આવી રહી છે.

થોડા વર્ષો પહેલા મોટાભાગની તમામ નદીઓ બારેમાસ પાણથી ખળખળ વહેતી રહેતી હતી. પરંતુ હવે ચોમાસાના બે-ચાર માસ બાદ નદીઓ સુકાવા લાગતી હોય છે. ગીરમાં હમણા સુધી મોટાભાગની નદીઓ બારે માસ ચાલતી અથવા તો ક્યાંક-ક્યાંક મોટા ખાડાઓ ભરેલા રહેતા હતાં. હવે ગીરને પણ ગ્લોબલ વોર્મિંગની અસર લાગી હોય તેમ મોટાભાગની નદીઓના નીર સુકાઈ ગયાં છે. જેના કારણે ગીરમાં વસવાટ કરતા હજારો વન્યજીવો મુશ્કેલીમાં મુકાઈ જાય છે.

પરંતુ દર વર્ષની જેમ વનવિભાગ દ્વારા ઉનાળાની શરુઆતમાં જે-જે વિસ્તારોમાં પાણીના સ્ત્રોત સુકાઈ જાય છે. તે-તે વિસ્તારોમાં બનાવામાં આવેલા કૃત્રિમ પાણીના પોઈન્ટો ભરવાનું ચાલું કરી દેવામાં આવ્યું છે. ત્યારે હવે ગીરની તમામ પાણીની કુંડીઓ ભરવાનું વનવિભાગે કાર્ય શરુ કરી દીધું છે.

વનવિભાગ દ્વારા નવીનવી પાણીની કુંડીઓ બનાવામાં આવી છે. જે આજે ગીર પૂર્વ તથા ગીર પિૃમ અને સાસણ ડિવીઝન હેઠળની કુલ ૫૦૦થી વધુ પાણીની કુંડીઓ કાર્યરત હોવાનું પણ જાણવા મળ્યું છે. તેને ભરવા માટે વનવિભાગ દ્વારા નદીઓમાંજ કુવાઓ બનાવામાં આવ્યાં છે. આ કુવાઓમાંથી પાણીની કુંડીઓ સુધી પહોંચાડવા માટે સોલાર પંપસંટ, પવનચક્કી, મજુરો વડે તથા જ્યાં પાણીના સ્ત્રોતો નથી તેવા વિસ્તારોમાં આ કુંડીઓ દિવસમાં બે વાર ભરવામાં આવતી હોવાનું જાણવા મળી રહ્યું છે.

ગીરની નદીઓ સુક્કી ભઠ્ઠ
ગીરમાંથી પસાર થતી મહત્વની સાતનદીઓમાં હીરણ, સરસ્વતી, દાતરડી, શિંગોડા, મછુન્દ્રી, ઘોડાવાડી અને રાવલના મોટાભાગના વિસ્તારોમાં નદીઓ સુક્કીભઠ્ઠ થઈ હોવાથી વનવિભાગ દ્વારા વન્યપ્રાણીઓની તરસ છીપાવવા માટે ભેરે જહેમત ઉઠાવવામાં આવી રહી છે.

10 થી 30 ફુટમાં પાણી
ગીરના કૃત્રિમ પાણીના પોઈન્ટો વનવિભાગ દ્વારા નદી, નાળાઓ, વોકળાઓમાંજ બનાવવામાં આવ્યાં છે. અને આ પોઈન્ટો ભરવા માટે કુંડીઓની બાજુમાં કુવાઓ બનાવામાં આવ્યાં છે. આ તમામ કુવાઓમાં માત્ર 10 ફુટથી લઈને 30 ફુટે પાણીનો અવિરત પ્રવાહ જોવા મળ્યો છે.