અરવલ્લીમાં હિટ એન્ડ રન, મોડાસા નગરપાલિકાના કોર્પોરેટરનું કરૂણ મોત

અરવલ્લીમાં હિટ એન્ડ રનની ઘટના સામે આવી છે. જેમાં મોડાસા નગરપાલિકાના કોર્પોરેટનું મોત નીપજ્યુ હોવાનું જાણવા મળ્યું છે. પ્રાપ્ત માહિતી પ્રમાણે મોડાસા નગરપાલિકાના નગર સેવક મનોજ ભાઈ રાઠોડ બાઈક પર ટિંટોઈ પાસેથી પસાર થઈ રહ્યા હતા. આ દરમિયાન અજાણ્યા વાહને ટક્કર મારતા મનોજભાઈ રોડ પર પટકાયા હતા. શરીર અને માથાના ભાગે ગંભીર ઈજાઓ થતાં તેમનું કમકમાટીભર્યું મોત નીપજ્યું હતું.

ઘટનાને પગલે મોડાલા રૂરલ પોલીસ ઘટનાસ્થળે પહોંચી મૃતકની લાશને પોસ્ટમોર્ટમ માટે હોસ્પિટલ ખસેડીને કાર્યવાહી હાથ ધરી હતી. કોર્પોરેટરનું મોત થતાં પાલિકાના નગરસેવકો અને કર્મચારીઓ તેમજ પરિવારમાં શોકનું મોજું ફરી વળ્યું છે.
મોડાસાની પુરુષોત્તમ નગર સોસાયટીમાં રરહેતા મનોજભાઈ ચંદુભાઈ રાઠોડ કલરકામના વ્યવ્સાય સાથે સંકળાયેલા છે. જેથી કામકાજ અર્થે બાઈક પર શામળાજી તરફ નીકળ્યા હતા. આ દરમિયાન ટિંટોઈ નજીક પેટ્રોલ પંપ પાસે અજાણ્યા વાહને બાઈકને ટક્કર મારતા માથાના અને શરીરના ભાગે ગંભીર ઈજાઓ થઈ હતી.

બનાવની જાણ થતાં ૧૦૮ એમ્બ્યુલન્સ ઘટનાસ્થળે પહોંચી અને તેમને સારવાર માટે હોસ્પિટલ લઈ ગયા હતા. જ્યાં ટૂંકી સારવાર દરમિયાન તેમનું મોત નીપજ્યું હતું.
અકસ્માતની જાણ થતાં જ મનોજભાઈના પરિવારજનો તેમજ મોટી સંખ્યામાં નગરપાલિકાના નગરસેવકો અને કર્મચારીઓ પણ દોડી આવ્યા હતા. હિટ એન્ડ રનની ઘટનાને પગલે મોડાસા રૂરલ પોલીસે અજાણ્યા વાહનચાલક સામે ગુનો નોંધીને કાયદેસરની કાર્યવાહી હાથ ધરી છે.