કચ્છની પ્રથમ યુવતી જેણે ઘરે કહ્યા વિના ફોર્મ ભર્યું હતું અને ટ્રેનિંગ પુરી કરીને BSF માં જોડાઈ

સામાન્યપણે લોકો એવું કહે છે કે ગુજરાતીઓ સંરક્ષણ દળોમાં ફરજ બજાવવાનું ઓછું પસંદ કરે છે પણ હવે સમય બદલાઈ રહ્યું છે. કચ્છના અનેક નવયુવાનો સેના અને અન્ય સુરક્ષા દળોમાં જોડાઈ દેશ માટે ફરજ બજાવે છે. તો ત્યારે હાલમાં જ કચ્છની એક 23 વર્ષીય યુવતીએ સુરક્ષા બળની ટ્રેનિંગ પૂરી કરી પોતાની પ્રથમ પોસ્ટિંગ મેળવી છે. સાથે જ તે કચ્છની પ્રથમ યુવતી બની છે જેણે બીએસએફની ટ્રેનિંગ પૂર્ણ કરી સરહદની ફર્સ્ટ લાઈન ઓફ ડિફેન્સમાં જોડાઈ હોય. ગુજરાતના સૌથી મોટા કચ્છ જિલ્લામાં છેલ્લા થોડા સમયથી સેના અને અન્ય લશ્કરી દળોમાં જોડાતા યુવાનોની સંખ્યામાં સતત વધારો થઈ રહ્યો છે. કચ્છના માંડવી તાલુકાના અનેક ગામોના યુવાનો સેનામાં જોડાયા છે તો આ બીજા અનેક યુવાનો તેના માટે તનતોડ મહેનત કરી રહ્યા છે. પણ હાલમાં જ સૌપ્રથમ વખત કચ્છની કોઈ યુવતીએ બોર્ડર સિક્યોરિટી ફોર્સની (સીમા સુરક્ષા બળ) પરીક્ષામાં ઉત્તીર્ણ થઈ, ટ્રેનિંગ પૂર્ણ કરી પોતાની પોસ્ટીંગ મેળવી છે. કચ્છના ભુજ તાલુકાના મિરજાપર ગામની 23 વર્ષીય ઉર્વશી ગુસાઈએ ગત મહિને જ પોતાની બીએસએફની કઠિન ટ્રેનિંગ પૂર્ણ કરી હતી. હવે ટ્રેનિંગ પૂરી કર્યા બાદ ઉર્વશીબેન પોતાની પ્રથમ પોસ્ટિંગ માટે રવાના થયા છે. ઉર્વશીબેને જણાવ્યું હતું કે તેઓ બીએસએફની પરીક્ષા આપ્યા પહેલા પાંચ વર્ષ એક ફોટો સ્ટુડિયોમાં નોકરી કરતા હતા. તે સમયે ફોન પર સેના અને અન્ય લશ્કરી દળ વિશેના સમાચારો વાંચી તેમને પણ સેનામાં જોડાવાની ઈચ્છા થઈ હતી. “બીએસએફમાં ફોર્મ ભર્યા સમયે મે ઘરમાં કોઈને જાણ કરી ન હતી. મેં મારા પિતાને પણ ફક્ત એટલું જ કહ્યું હતું કે સરકારી નોકરીનું ફોર્મ ભર્યું છે. મારી લેખિત અને પ્રેક્ટીકલ પરીક્ષા પૂર્ણ થયા બાદ જ મેં ઘરે જાણ કરી હતી કે હું બીએસએફની ટ્રેનિંગ માટે ઉત્તીર્ણ થઈ છું,” તેવું ઉર્વશીબેને જણાવ્યું હતું.