કપરાડાના અંભેટીમાં માટી ચોરી પકડવા ગયેલી ટીમ પર હુમલો કરાયો

કપરાડા વિસ્તારમાંથી ગેરકાયદે માટી ખનન થઇ રહ્યું હોવાની બાતમી જિલ્લા સેવા સદનમાં ભુસ્તર વિભાગની કચેરીમાં સુપરવાઇઝર તરીકે ફરજ બજાવતા દિનેશકુમાર નાનજીભાઇ પવાયા ઓફિસના બે સિક્યુરિટી ગાર્ડ હેતલ ચંદુભાઇ માહ્યાવંશી અને મનિષ દિપકભાઇ હળપતિ સાથે ખાનગી વાહનમાં બેસીને કપરાડાના સુખાલાથી અંભેટી તરફ જવાના માર્ગ ઉપર ચેકિંગ કરવા માટે નીકળ્યા હતા. ગેરકાયદે માટીખનનની પ્રવૃતિ ઉપર કાર્યવાહી કરવા નીકળેલી ભૂસ્તર વિભાગની ટીમ અંભેટી રોડ ઉપર પહોંચી ત્યારે ટ્રક નંબર જીજે ૧૫ યુયુ ૫૬૫૪ને આંતરીને તપાસ કરતા હાર્ડ મોરમ ભરેલું જણાયું હતું. ચાલક પાસેથી પાસ પરમિટ માગતા તેની પાસે કોઇપણ જાતની પરવાનગી નહિં હોવાનું જણાવતા ટ્રકને સાઇડે ડીટેઇન કરીને ગાર્ડ હેતલ માહ્યાવંશીને ત્યાં ઊભી રાખ્યો હતો. સુપરવાઇઝર અને અન્ય ગાર્ડ તપાસ અર્થે ધગડમાળની નીલકંઠ ક્વોરી તરફ જઇ રહ્યા હતા તે વખતે ગાર્ડ હેતલે ફોન કરીને સુપરવાઇઝરને જણાવ્યું હતું કે, કોપરલીગામે રહેતા જિતુભાઇ, હિતેશ આહિર અને હરિશ આહિર અને જિલ્લા પંચાયત સભ્ય મિતેશ પટેલ તમામ રહે. રાતા સહિત કેટલાક માણસો આવીને ધકી આપીને ધક્કા મુકીને હુમલો કરવાનો પ્રયાસ કર્યો છે. હિતેશ આહિર અને જિતુએ ગાર્ડને લાતો મારીને ધમકી પણ આપીને પકડેલી ટ્રક લઇને ભાગી ગયા હતા. થોડા સમય પછી સુપરવાઈઝર દિનેશ પવાયા સ્થળ ઉપર પહોંચતા તેમને પણ ભૂમાફિયાએ ધમકીભર્યા સ્વરમાં કહ્યું કે, તમે પ્રાઇવેટ વાહનમાં ચેકિંગ કેમ કરો છો. ધમકી અને બબાલને જાેતા જ સુપરવાઇઝરનો ડ્રાઇવર પણ ત્યાંથી ફરાર થઇ ગયો હતો.

ભૂમાફિયા જિતુ અને હિતેશ આહિરે ગાર્ડને ધમકી આપી હતી કે, તમે નોકરી છોડી દો, હવે પછી આ રીતે વાહન ચેકિંગ કરવા માટે આવશો તેમજ અમારી ગાડી રોકશો તો જાનથી મારી નાંખીશું. અંભેટી ગામે માટી ચોરી પ્રવૃતિને રોકવા માટે નીકળેલી વલસાડ ભૂસ્તર વિભાગની ટીમ ઉપર ભૂમાફિયાએ હુમલો કરીને જાનથી મારી નાંખવાની ધમકી આપતા સમગ્ર વિસ્તારમાં ચકચાર મચી છે. આ બનાવ અંગે સુપરવાઇઝર દિનેશ પવાયાએ નાનાપોંઢા પોલીસ સ્ટેશનમાં ગુજરાત ખનિજ નિયમ ૨૦૧૭ મુજબ તથા ફરજમાં રૂકાવટ ઊભી કરવા બદલ ફરિયાદ નોંધાવતા પોલીસે આરોપીની ધરપકડ કરવા ચક્રોગતિમાન કર્યા છે.

ટ્રક નંબર જીજે ૧૫ એવી ૫૪૫૬નું વજન કરાતા તેમાંથી ૨૬.૫૪૦ મેટ્રિક ટન અને અન્ય એક ટ્રકમાંથી ૧૫ મેટ્રિક ટન હાર્ડ મોરમ ભરવામાં આવ્યું હતું જેની કોઇપણ જાતની પરવાનગી ન હતી. ભૂમાફિયાઓને જાણે કોઇપણ ડર રહ્યો ન હોય એ રીતે ખાણ ખનિજ વિભાગે કબજે લીધેલી ટ્રકને ગાર્ડને માર મારીને છોડાવી ગયા હતા.