ખંભાતમાં પૈસાની લેતી દેતીમાં સમાજસેવિકાને ઝાડ સાથે બાંધી પઠાણી ઉઘરાણી કરી

ગુજરાતમાં દિવસેને દિવસે ક્રાઈમ રેટ રોકેટ ગતિએ વધી રહ્યો છે તેમ જણાઈ રહ્યું છે ત્યારે ખંભાત શહેરના અકબરપુર, મોટી ચુનારવાડ પાસે એક સમાજ સેવિકા પાસે બે મહિલા સહિત ચાર શખ્સોએ બે લાખનો ચેક માંગીને ગડદાપાટુનો માર મારીને પીપળાના ઝાડ સાથે બાંધી દેવાનો મામલો સામે આવ્યો છે. જાેકે, ૧૨ દિવસ પહેલાં બનેલી આ ઘટના અંગે મહિલાએ અવાર-નવાર ઉચ્ચ કક્ષાએ રજૂઆત કરતાં આખરે ખંભાત શહેર પોલીસે ગુનો નોંધી કાર્યવાહી હાથ ઘરી છે. ફરિયાદી નિતલબેન ઉર્ફે મિત્તલબેન નિતિનભાઈ સુથાર સમાજ સેવિકાનું કામકાજ કરે છે.

અને એકાદ વર્ષ પહેલા સુનિલભાઈ ઉર્ફે જાગો ચુનારા, હાર્દિકભાઈ રાજેશભાઈ ચુનારા, કોકિલાબેન રાજેશભાઈ ચુનારા અને મીનાબેન ચુનારાનું સરકારની જનધન યોજના એસબીઆઈમાં ખાતા ખોલાવી આપ્યા હતા અને આવકના દાખલા પણ કઢાવી આપ્યા હતા. ચારેય જણાં દ્વારા બે લાખના ચેકની માંગણી ચાલુ કરી દેવામાં આવી હતી. ગત સાતમી જુલાઈના રોજ તેણી તાલુકા પંચાયતમાં હાજર હતી ત્યારે એ સમયે ચારેય શખસો રીક્ષા લઈને આવ્યા હતા અને તેને બળજબરીથી રીક્ષામાં બેસાડી અકબરપુર, મોટી ચુનારવાડ પાસે લઈ ગયા હતા.

જ્યાં તેની પાસે બે લાખના ચેકની માંગણી કરી હતી. પરંતુ તેણીએ ચાર હજાર રૂપિયા રોકડા લાવી છું, તે આપી દઉ તેમ કહેતા જ ચારેય જણા એકદમ ઉશ્કેરાઈ ગયા હતા અને ગમે તેવી અપશબ્દ બોલીને નજીકમાં આવેલા પીપળાના ઝાડ સાથે દોરડાથી બાંધી દઈને ઉપર ગોળવાળુ પાણી નાંખ્યું હતુ. જયેશભાઈ અને સુનિલભાઈએ આ અંગેનો વીડિયો બનાવ્યો હતો. મહિલાએ બુમાબુમ કરતા આસપાસના લોકો એકત્ર થઈ ગયા હતા અને મિત્તલબેનને છોડાવ્યા હતા.

આ અંગે તેઓએ ખંભાત શહેર પોલીસ મથકે તમામ વિરૂદ્ધ ફરિયાદ આપતાં પોલીસે ચારેય જણાં વિરૂદ્ધ ગુનો નોંધી ધરપકડની કાર્યવાહી હાથ ધરી છે. મારી સાથે તમામ લોકોએ ખૂબ ખોટું કર્યું છે. હું ખૂબ આઘાતમાં હતી. અનેક વખત મને આપઘાતના પણ વિચાર આવતા હતા. જાેકે, મારી સાથે ખૂબ ખોટું કર્યું છે. હવે પોલીસે મારી ફરિયાદ લીધી છે ત્યારે તેઓ દ્વારા અવાર-નવાર સમાધાન કરવાની વાત કરવામાં આવે છે. પરંતુ હવે હું સમાધાન કરવાની નથી. તે તમામે મારૂં જીવવું હરામ કરી દીધું છે.