ગુજરાતમાં ૯ વર્ષમાં ૧૦મું પેપર ફૂટ્યુ

રાજ્યમાં છેલ્લા ૯ વર્ષમાં ભરતીની ૧૦મી પરીક્ષાનું પેપર લીક થયું હતું. આ તરફ ભરતી કરનારાં ગૌણ સેવા પસંદગી મંડળના ચેરમેન આસિત વોરાના પગ તળે રેલો આવતાં હવે પોલીસને પેપર લીક મામલે અરજી કરી છે. અત્યાર સુધી પેપર લીકનો ઇન્કાર કરનારા અને ફરિયાદ મળશે તો જ પગલા ભરાશે તેવું કહેનારાં વોરાએ સાબરકાંઠા પોલિસને ઇમેઇલ કરી જાણ કરી છે. આપના નેતા યુવરાજ જાડેજાએ આ મામલો બહાર લાવવાના પ્રયત્નો કર્યાં હતાં અને ગૌણ સેવા મંડળને પેપર લીક થયાંની જાણકારી આપી હતી છતાં તેને મંડળે અવગણ્યો હતો. બુધવારે જાડેજાએ આ અંગેના પૂરાવા આપીને સરકાર બે દિવસમાં પેપર લીક થયેલું જાહેર કરી પગલાં લે નહીંતર આંદોલન કરવામાં આવશે તેવી ચીમકી આપતાં હવે સરકાર પણ હરકતમાં આવી છે. આ મામલાને ગૃહ રાજ્ય મંત્રી હર્ષ સંઘવીએ ખૂબ સાવચેતીથી લીધો હતો અને બે દિવસથી મિટીંગોનો દોર શરૂ કરી દીધો હતો. રાજ્ય સરકારના સૂત્રો જણાવે છે કે આ મામલામાં મુખ્ય સૂત્રધાર એવાં આઠ પૈકી પાંચને પોલિસે પકડી પાડ્યાં છે અને બાકીના ઘણાં લોકોની શોધખોળ ચાલું છે. આ લોકો પકડાઇ જાય તે પછી તેમના ઉપર પાસાથી લઇને અન્ય ઘણી કડકમાં કડક કલમો લગાવાઇ શકે છે. આ કૌભાંડના મુખ્ય સૂત્રધારો જયેશ તથા અન્ય આરોપી કેતને આ પરિક્ષાર્થીઓને જણાવ્યું કે તેમણે અગાઉ સરકારી ભરતીમાં સબ ઓડિટર અને સ્ટાફ નર્સની ભરતીમાં પેપર ફોડ્યાં અને તે મેળવનારાંઓને નોકરી મળી ગઇ છેગુજરાત સરકાર શુક્રવારે હેડ ક્લાર્કની ભરતીનું પેપર ફૂટી ગયાંની જાહેરાત કરશે. આ સાથે આ ભરતી પરિક્ષા રદ્દ થયેલી જાહેર કરાઇને નવી તારીખોની જાહેરાત ટૂંકમાં થશે તેવી ઘોષણા પણ કરશે. ગુજરાત સરકારના સૂત્રોએ જણાવ્યું કે સરકારને પહેલાં જ દિવસે આ બાબતની ગંધ આવી ગઇ હતી, પરંતુ પેપર ફોડનારાં તત્ત્વો ભૂગર્ભમાં ઉતરી ન જાય તે માટે આ બાબત ગુપ્ત રખાઇ હતી. પોલીસે મુખ્ય સુત્રધાર જયેશ પટેલ સહિત પાંચ આરોપીઓની ધરપકડ કરી છે.