ગોધરા તાલુકા ભામૈયા ગામમાં ગાડીએ બાઇક સવાર દંપતીને અડફેટે લેતા મહિલાનું મોત થયું

ગોધરા તાલુકા ભામૈયા ગામે પિકઅપ ચાલકે બાઈક સવાર દંપતીને અડફેટે લીધું હતું.જેમાં બાઈક પર સવાર મહિલાનું સારવાર દરમ્યાન મૃત્યુ નિપજ્યું હતું. ભામૈયા ગામે આવેલા ઠાકોર ફળિયામાં રહેતા નરવતસિંહ યશવંતસિંહ રાઉલજીએ ગોધરા શહેર બી ડિવિઝન પોલીસ મથકે ફરિયાદ નોંધાવી હતી. ગત ૨૭ ઓકટોબર સાંજે સાડા છ વાગ્યે તેઓ કૈલાશબેનને પોતાની બાઈક પર બેસાડીને ભામૈયા ગામના બસ સ્ટેન્ડ પાસેથી પસાર થઈ રહ્યા હતા.

તે વેળાએ પૂરઝડપે આવેલા એક પિકઅપ વાહનના ચાલકે બાઈક સવાર દંપતિને અડફેટે લીધું હતું.આ અકસ્માતમાં બંને વ્યક્તિઓ ફંગોળાઈને રોડ પર પડયા હતા. જેમાં નરવતસિંહ રાઉલજીને માથાના ભાગે ગંભીર ઈજાઓ પહોંચી હતી. બાઈક પર બેઠેલા કૈલાશ બેનને શરીરે ગંભીર ઈજા પહોંચી હતી. અકસ્માત બાદ પિકઅપ ચાલક પોતાનું વાહન લઇ ફરાર થઈ ગયો હતો, જ્યારે ઇજાગ્રસ્ત હાલતમાં કૈલાશબેનને સારવાર અર્થે ખસેડવામાં આવ્યા હતાં, તેઓએ પોતાનો દમ તોડયો હતો. સમગ્ર ઘટનાને લઈને તા મોડીરાત્રે ગોધરા શહેર બી ડિવિઝન પોલીસ મથકે પિકઅપ ચાલક સામે ફરિયાદ નોંધાવા પામી છે.