જે.વી. મોદી હાઈસ્કૂલ – સાવરકુંડલા  માંવિદ્યાર્થી સન્માન સમારોહ નું ભવ્ય આયોજન કરવામાં આવ્યું.

યુવક અને સાંસ્કૃતિક પ્રવૃત્તિઓ વિભાગ-  ગાંધીનગર ના ઉપક્રમે અને જિલ્લા રમત-ગમત અધિકારી ની કચેરી દ્વારા આયોજિત અમરેલી જિલ્લા કક્ષાના કલા મહાકુંભ સ્પર્ધા- ૨૦૨૨/૨૩ તથા રાજ્ય કક્ષા યુવા મહોત્સવ સ્પર્ધા-૨૦૨૨/૨૩ માં શહેરની ઐતિહાસિક શાળા જે.વી. મોદી હાઈસ્કૂલના વિદ્યાર્થીઓ પ્રથમ અને દ્વિતીય નંબરે વિજેતા થતા તેમનો ભવ્ય સન્માન કાર્યક્રમ સંસ્થાના ટ્રસ્ટીઓ અને આમંત્રિતો ની ઉપસ્થિતિમાં રાખેલો હતો. આ કાર્યક્રમમાં નૂતન કેળવણી મંડળના ઉપપ્રમુખ મુકુંદભાઈ નાગ્રેચા, ટ્રસ્ટી કનુભાઈ ગેડિયા, ટ્રસ્ટી વિનુભાઈ રાવળ, કારોબારી સભ્ય ગીતાબેન જોશી, વી. ડી. કાણકિયા કોલેજના આચાર્ય પ્રો. શૈલેષભાઇ રવીયા, સાવરકુંડલા શહેરના જાણીતા પત્રકાર પાંધી સર તેમજ શહેરના અન્ય મોભીઓ ની હાજરી રહી હતી

કાર્યક્રમની શરૂઆતમાં શાળાના આચાર્ય આશિષભાઈ જોશી એ આગંતુકોનું શાબ્દિક સ્વાગત કર્યું હતું તેમજ વિદ્યાર્થીઓ દ્વારા પુષ્પગુચ્છ આપી મહેમાનોનું સ્વાગત કરવામાં આવ્યું હતું. કાર્યક્રમની શરૂઆતમાં શાળાના સંગીત વિભાગના હેડ સંજયભાઈ મહેતાએ સંપૂર્ણ કાર્યક્રમની રૂપરેખા રજૂ કરી તેમજ પ્રાર્થના ગીત રજૂ કર્યું હતું. આ કાર્યક્રમ માં રાજયકક્ષાના યુવા મહોત્સવ ૨૦૨૨/૨૩ માં લોકવાદ્ય (ઢોલ) સ્પર્ધામાં સમગ્ર રાજ્યમાં પ્રથમ નંબર મેળવનાર ગોસ્વામી મંત્ર કે.  અને કલા મહાકુંભ ૨૦૨૨/૨૩ પ્રદેશ કક્ષાએ સુગમ સંગીતમાં દ્વિતીય નંબર મેળવનાર ચોહાણ શાહનવાઝ એસ. અને જિલ્લાકક્ષાના કલા મહાકુંભ ૨૦૨૨/૨૩ માં સમૂહ ગીતમાં પ્રથમ નંબર મેળવનાર વિદ્યાર્થીઓની ટીમને સન્માનિત કરવામાં આવી.

નૂતન કેળવણી મંડળ સાવરકુંડલાના ઉપપ્રમુખ મુકુંદભાઈ નાગ્રેચાએ પ્રસંગોચિત વક્તવ્ય આપ્યું તેમજ પ્રમુખ ચંદ્રિકાબેન કામદાર અને મેનેજિંગ ટ્રસ્ટી  જયંતીભાઈ વાટલીયા તેમજ અન્ય ટ્રસ્ટીઓએ પણ શુભેચ્છા સંદેશો પાઠવેલ હતો. કાર્યક્રમના અંતે શાળાના ઉચ્ચતર માધ્યમિક વિભાગના શિક્ષક જયશ્રીબેન સોલંકી એ સર્વ નો આભાર માન્યો હતો. આ કાર્યક્રમને સફળ બનાવવા શાળાના તમામ શિક્ષક ભાઈઓ બહેનોએ તેમજ શાળાના સંગીત વિભાગના વિદ્યાર્થીઓએ વિશેષ જહેમત ઉઠાવી હતી. આ કાર્યક્રમનું સફળ સંચાલન શાળાના ધોરણ ૧૨ માં અભ્યાસ કરતા વિદ્યાર્થી ધ્યેયરાજસિંહ અર્જુનસિંહ પરમારે કર્યું હતું.