પાકિસ્તાન યુવાનોને રોજગારી આપવા માટે અને ભૂખ્યા નાગરિકોને રોટલી આપવા કરી રહ્યું છે સંઘર્ષ

પાકિસ્તાન દિવસેને દિવસે આર્થિક રીતે કંગાળ બની રહ્યું છે. પાકિસ્તાનમાં વધતી જતી મોંઘવારી અને ઘટતા વિદેશી હૂંડિયામણના ભંડારે લોકોની તેમજ શાસકોની ચિંતામાં વધારો કર્યો છે. પોતાને દેશની મદદગાર ગણાવતી સેના આ સમગ્ર આર્થિક વિકાસ પર મૌન છે તે આશ્ચર્યજનક છે. ભારત સાથે ૪ યુદ્ધ હાર્યા બાદ પાકિસ્તાનની સેના અને સરકાર કોઈક રીતે પરમાણુ બોમ્બ બનાવવામાં સફળ રહી છે. પરંતુ દેશની પ્રગતિ માટે કંઈ ખાસ કર્યું નહીં. આ જ કારણ છે કે, આ ઇસ્લામિક દેશની અત્યારે આવી હાલત છે. ૧૯૪૭માં વિભાજન (ભારત-પાકિસ્તાન વિભાજન) પછી, ભારતે લશ્કરી શક્તિથી આર્થિક ક્ષેત્રે પ્રગતિ કરવાનું ચાલુ રાખ્યું હતું. જ્યારે પાકિસ્તાનનું ધ્યાન ફક્ત લશ્કરી સાધનો એકત્ર કરવા પર હતું.

આજે પાકિસ્તાન આર્થિક અને સૈન્ય શક્તિની દૃષ્ટિએ ક્યાંયનું નથી રહ્યું. પાકિસ્તાન પાસે પરમાણુ બોમ્બ હોવા છતાં યુવાનોને રોજગારી આપવા માટે અને ભૂખ્યા નાગરિકોને રોટલી આપવા માટે લોટના અભાવે તે સંઘર્ષ કરી રહ્યું છે. આઝાદી પછી ભારતની અર્થવ્યવસ્થા ઝડપથી આગળ વધી અને આજે તે વિશ્વની પાંચમી આર્થિક શક્તિ બની ગઈ છે. જ્યારે પાકિસ્તાનની અર્થવ્યવસ્થા ૪૪મા નંબર પર છે. એટલે કે આર્થિક મોરચે પાકિસ્તાન ભારત કરતા ઘણું પાછળ છે. ત્યારે ભારત ૨૦૩૦ સુધીમાં વિશ્વની ત્રીજી અર્થવ્યવસ્થા બની જશે. જ્યારે પાકિસ્તાન પર ૨૦૩૦ સુધીમાં ભારે દેવું થઈ શકે છે. હાલમાં ભારતનો જીડીપી ૩.૪૬ ટ્રિલિયન ડોલર છે અને ભારત ૫ ટ્રિલિયન અર્થતંત્રના લક્ષ્ય તરફ આગળ વધી રહ્યું છે.

બીજી તરફ, પાકિસ્તાનનો જીડીપી લગભગ ૩૭૬ બિલિયન ડોલર છે. તાજેતરના ડેટા અનુસાર, ભારતનું વિદેશી મુદ્રા ભંડાર ૬૩૪.૨૮૭ બિલિયન ડોલર છે અને દેશનું ફોરેક્સ રિઝર્વ ગયા વર્ષે આ જ તારીખે ૫૭૩.૭૨૭ બિલિયન ડોલર હતું. ત્યારે પાકિસ્તાનની વિદેશી મુદ્રા ભંડાર માત્ર ૩.૬૭ બિલિયન ડોલર છે. અત્યારે અમેરિકી ડૉલર લગભગ ૮૨ રૂપિયા બરાબર છે. પાકિસ્તાની રૂપિયા સામે ડૉલરની કિંમત ૨૨૪ રૂપિયા છે.

હાલમાં માત્ર મોંઘવારી મામલે પાકિસ્તાન ભારતથી આગળ છે. ડુંગળીથી લઈને પેટ્રોલ સુધી અહીં દરેક વસ્તુ મોંઘી છે. અહીં ડુંગળીની કિંમત ૨૨૦.૪ રૂપિયા પ્રતિ કિલો પહોંચી ગઈ છે. પાકિસ્તાનમાં દૂધની કિંમત ૧૧૪.૮ રૂપિયા પ્રતિ લિટરથી વધીને ૧૪૯.૭ રૂપિયા પ્રતિ લિટર થઈ ગઈ છે. લોટના ભાવ ૧૫૦ રૂપિયા પ્રતિ કિલોથી વધી ગયા છે. આ સાથે જ સરસવનો ભાવ રૂ.૫૦૦ને પાર કરી ગયો છે. પાકિસ્તાનમાં પેટ્રોલ ૨૪૯.૮૦ રૂપિયા પ્રતિ લીટર, હાઈ-સ્પીડ ડીઝલ ૨૬૨.૮૦ રૂપિયા પ્રતિ લીટર, કેરોસીન ૧૮૯.૮૩ રૂપિયા પ્રતિ લીટર અને લાઈટ ડીઝલ ૧૮૭ રૂપિયા પ્રતિ લીટરના ભાવે વેચાઈ રહ્યું છે.