પાટડી ખારાઘોડા રણમાં પાણીનાં ટેન્કર બંધ થયાં બાદ ઓડું બોર પણ ફેલ પાણી બંધ

ગાંધીનગર પાણી પુરવઠા બોર્ડ દ્વારા રણમાં ટેન્કરો દ્વારા પાણી પુરૂ પાડતા કોન્ટ્રાક્ટરને સીઝનથી અત્યાર સુધીમાં એક પણ બિલ ન ચૂકવતા ગત ૧૦મી માર્ચથી રણમાં ટેન્કરો દ્વારા પીવાના પાણીનું વિતરણ બંધ છે. વધુમાં બીજી બાજુ ઓડું બોર પણ ફેઇલ થતાં રણમાં પાઇપલાઇનથી પણ અગરિયાઓને પાણી બંધ કરાતા પાણીનો પોકાર શરૂ થયો છે. છેલ્લા ૩ દિવસથી રણમાં પીવાના પાણીની એક બુંદ પણ ન મળતા મીઠું પકવતા અગરિયા પરિવારોનો પાણી માટે રઝળપાટ કરવાની નોબત આવી છે. દેશનું ૭૦ % મીઠું પકવતા ગુજરાતના ગૌરવસમા મીઠા ઉદ્યોગ સાથે સંકળાયેલા ગરીબ અને પછાત અગરિયા પરિવારોને રણમાં ઓક્ટોબર માસથી મીઠું પકવવાની શરૂઆત થાય ત્યારથી જ પાણી પુરવઠા વિભાગ દ્વારા ટેન્કરો દ્વારા અને ઓડું ગામના બોરમાંથી રણમાં ૩૫ કિ.મી.સુધીની પાઇપલાઇન દ્વારા પીવાનું પાણી પુરૂ પાડવામાં આવતુ હતુ.

ત્યારે આ વર્ષે ૮ ટેન્કરો દ્વારા રણમાં મીઠું પકવતા અગરિયા પરિવારોને દર ૧૫ દિવસે નિયમિત પીવાનું પાણી પુરૂ પાડવામાં આવતું હતુ. પરંતુ ગાંધીનગર પાણી પુરવઠા બોર્ડ દ્વારા રણમાં ટેન્કરો દ્વારા પાણી પુરૂ પાડતા કોન્ટ્રાક્ટરને સીઝનથી અત્યાર સુધીમાં એક પણ બિલ ન ચૂકવતા કોન્ટ્રાક્ટર દ્વારા ગત ૧૦મી માર્ચથી રણમાં ટેન્કરો દ્વારા પીવાના પાણીનું વિતરણ બંધ કરવામાં આવ્યું હતુ.

કારણ કે, એમને આઠ ટેન્કરોમાં રોજના રૂ. ૮૦,૦૦૦નું તો ડીઝલ પુરૂ પડાવવુ પડતુ હતુ. બીજી બાજુ રણમાં પાઇપલાઇન દ્વારા જ્યાંથી પાણી પુરૂ પાડવામાં આવતુ હતુ એ ઓડું ગામનો બોર પણ ફેઇલ થતાં રણમાં પાઇપલાઇનથી પણ અગરિયાઓને પાણી બંધ થતાં વેરાન રણમાં ઉનાળાની શરૂઆતમાં જ પાણીનો પોકાર શરૂ થયો છે. છેલ્લા ૩ દિવસથી રણમાં પીવાના પાણીની એક બુંદ પણ ન મળતા મીઠું પકવતા અગરિયા પરિવારોનો પાણી માટે મોટરસાયકલ પણ દૂર-દૂર સુધી રઝળપાટ કરવાની નોબત આવી છે. હજી આગામી દિવસોમાં રણમાં ગરમીનો પારો ૪૮ ડીગ્રીને પણ પાર જાય એમ હોવાથી તંત્ર દ્વારા અગરિયા પરિવારો માટે રણમાં પીવાના પાણીની વ્યવસ્થા શરૂ કરવામાં આવે એવી વ્યાપક માંગ ઉઠી છે.