બગસરા ખાતે નગરપાલિકા સેવા સેતુ કાર્યક્રમનું સફળ આયોજન : અરજદારોની અરજીઓનો સ્થળ પર નિકાલ

બગસરા નગરપાલિકાના દ્વારા સેવા સેતુ કાર્યક્રમનું સફળ આયોજન કરવામાં આવ્યુ હતુ. જેમાં સરકારની વિવિધ સેવાઓનો લાભ અરજદારોએ ઘરઆંગણે મેળવ્યો હતો. લોકોને આવકના દાખલા, નોન ક્રિમિલેયર સર્ટિફિકેટ, આરોગ્ય ચકાસણી ઉપરાંત સરકારની વિવિધ જનકલ્યાણકારી યોજનાઓની અરજીઓનો હકારાત્મક નિકાલ કરવામાં આવ્યો હતો.તા.૩૧ ઓક્ટોબર સુધી રાજયભરમાં યોજાનાર આ સેવા સેતુ કાર્યક્રમના ૧૦મા તબક્કા અંતર્ગત તાલુકા દીઠ ૩ અને નગરપાલિકા-મહાનગરપાલિકા દીઠ ૨ સેવા સેતુ કાર્યક્રમ યોજવામાં આવી રહ્યા છે.

રાજ્ય સરકારના વિવિધ વિભાગોની ૫૫ જેટલી જનકલ્યાણલક્ષી સેવા-સુવિધા સેવા સેતુમાં નાગરિકોને સ્થળ પર પૂરી પાડવાનો ઉદ્દેશ્ય છે. સેવા સેતુ કાર્યક્રમ એ રાજ્ય સરકારના જનકલ્યાણલક્ષી અભિગમનું એક પરિમાણ છે.  સેવા સેતુ કાર્યક્રમના માધ્યમથી અરજદારોની  અરજીઓનો સ્થળ પર જ હકારાત્મક રીતે ઉકેલ આવી રહ્યો છે.રાજ્ય સરકારના પારદર્શી અભિગમ સુશાસન વ્યવસ્થા અંતર્ગત સેવા સેતુ કાર્યક્રમ દ્વારા નાગરિકોની વિવિધ સમસ્યાઓનું નિવારણ ત્વરાએ મળી રહે છે.