ભરૂચમાં પિતા-પુત્રોએ પોલીસ સ્ટેશનની બહાર દારૂની રેંકડી શરૂ કરી દીધી

ભરૂચ જિલ્લા પોલીસ અધિક્ષક મયુર ચાવડાએ ચાર્જ લીધા બાદ પ્રોહીબીશનની બદી સામે કડક કાર્યવાહીની સૂચના આપી છે. આદેશના પગલે ક્રાઇમ બ્રાન્ચ સહીત સ્થાનિક ભરૂચ પોલીસ એક્શન મોડમાં છે. ભરૂચ શહેર એ ડિવિઝન પોલીસે આખા વિસ્તારને ધમરોળી દારૂની બદી ઉપર નિયંત્રણ મેળવવા જાેર લગાવ્યું હતું પણ પોલીસ એ ડિવિઝન પો સ્ટેના ૧૦૦ મીટરના દાયરામાં દારૂની બદી ફેલાવવાની કોઈ હિંમત કરી ન શકે તેવા અતિ વધારે પડતાં આત્મવિશ્વાસમાં હતી તેનો લાભ ઉઠાવી પિતા – પુત્રોએ પોલીસ સ્ટેશનની બહાર દારૂની રેંકડી શરૂ કરી દીધી હતી. ભરૂચ શહેર એ ડિવિઝન પોલીસે ઇકબાલ સમસુદીન શેખ અને તેના પુત્ર અલ્તાફ ઇકબાલ શેખની ધરપકડ કરી છે. આ શખ્શ પોલીસ સ્ટેશન બહાર સોડા અને ઠંડા પીણાની લારી ચલાવે છે. આ શખ્શ લારી ઉપર ઠંડા પીણાંની ઓથમાં દારૂ વેચતો હતો. પોલીસ સ્ટેશનની પ્રિમાઇસીસને અડીને આવેલી લારી ઉપર આ બદી ચાલતી હોવાની પોલીસ શંકા પણ કરી શકી ન હતી અને આ શખ્શ બેરોકટોક દારૂ વેચતો રહ્યો હતો. સ્ટ્રોંગ અને નોર્મલ સોડાના કોડવર્ડથી દારૂ વેચાતો હોવાનું જાણવા મળ્યું છે.