ભારત આવેલા ચિત્તાને હરણને પીરસાતા ભાજપના જ નેતાએ કર્યો વિરોધ

નામીબીયાથી લાવવામાં આવેલા ચિત્તાઓને કુનો નેશનલ પાર્કમાં ચિત્તલ અને હરણ પીરસવાનો મુદ્દો હવે વેગ પકડી રહ્યો છે. હાલમાં જ ભાજપમાં જોડાયેલા હરિયાણાના મોટા નેતા કુલદીપ બિશ્નોઈએ તેની નિંદા કરી છે. આ સાથે કેન્દ્ર સરકારને તાત્કાલિક તેને રોકવાની માંગ કરવામાં આવી છે.કુલદીપ બિશ્નોઈએ સોમવારે સોશિયલ મીડિયા પર લખ્યું, ચિત્તાઓને ખોરાક માટે ચિતલ અને હરણ મોકલવાની સૂચનાઓ આવી રહી છે, જે અત્યંત નિંદનીય છે. હું કેન્દ્ર સરકારને વિનંતી કરું છું કે રાજસ્થાનમાં લુપ્ત થવાના આરે પહોંચી ગયેલી હરણની પ્રજાતિ અને બિશ્નોઈ સમાજની લાગણીને ધ્યાનમાં રાખીને આ બાબતની તપાસ કરવામાં આવે અને જો આવું છે તો તેને તાત્કાલિક બંધ કરવામાં આવે.

તમને જણાવી દઈએ કે હરિયાણાના બિન-જાટ નેતા કુલદીપ બિશ્નોઈ તાજેતરમાં કોંગ્રેસના ધારાસભ્ય પદ પરથી રાજીનામું આપીને ભાજપમાં જોડાયા છે.

પત્રમાં વધુમાં લખવામાં આવ્યું છે કે બિશ્નોઈ સમાજ તેના આરાધ્ય ગુરુ જંભેશ્વર ભગવાન દ્વારા બતાવેલા સિદ્ધાંતોને અનુસરીને છેલ્લી પાંચ સદીઓથી પર્યાવરણ, પ્રકૃતિ અને વન્યજીવોનું રક્ષણ કરી રહ્યો છે. અમે વિશ્વમાં એકમાત્ર એવો સમાજ છીએ, જે વૃક્ષો અને વન્યજીવો માટે બલિદાન આપી રહ્યો છે. અમારા 363 શહીદોનું ઉદાહરણ સૌની સામે છે.

ચિત્તાઓની ભૂખ સંતોષવા માટે, શ્યોપુર જિલ્લામાં સ્થિત કુનો નેશનલ પાર્કમાં 181 ચિત્તલો છોડવામાં આવ્યા છે. આ ચિત્તલો મધ્યપ્રદેશના રાજગઢ જિલ્લાના નરસિંહગઢ સ્થિત ચિડીખો અભયારણ્યમાંથી અહીં લાવવામાં આવી છે.તમને જણાવી દઈએ કે ભારતમાં લગભગ 74 વર્ષ પહેલા ગાયબ થઈ ગયેલી ચિત્તાની પ્રજાતિને બચાવવા માટે ચિતા પ્રોજેક્ટ બનાવવામાં આવ્યો છે. જે અંતર્ગત દક્ષિણ આફ્રિકાના નામીબિયાથી ભારતમાં ચિત્તાઓને લાવવામાં આવી રહ્યા છે. 16 જૂનના રોજ, કુનોમાં તૈયારીનું નિરીક્ષણ કરવા આવેલા દક્ષિણ આફ્રિકા અને નામીબિયાના નિષ્ણાતો (ડૉ. લૉરી માર્કર, વિસેન્ટે એડેન્જર, ડૉ. એડ્રિયન અને સાયમન્ડ એન્ડબૉન્ડ)એ અહીં ચિતલની સંખ્યા વધારવાનું સૂચન કર્યું હતું.

બીજી તરફ બિશ્નોઈ મહાસભાના અઘ્યક્ષ દેવેન્દ્ર બૂડિયાએ પણ વડાપ્રધાન નરેન્દ્ર મોદીને પત્ર લખીને નારાજગી વ્યક્ત કરી છે. બિશ્નોઈ સમાજ વતી પ્રધાનમંત્રીને લખવામાં આવ્યું હતું કે, ભારત સરકારે તમારા નેતૃત્વમાં નામીબિયાથી લાવી 8 ચિત્તાઓ ભારતના જંગલોમાં લુપ્ત થતી પ્રજાતિઓને પુનઃસ્થાપિત કરવા માટે છોડ્યા છે. પરંતુ તેમના ખોરાક માટે ચિતલ, હરણ વગેરે મર્યાદિત હદમાં છોડી દેવામાં આવ્યા છે, જેના કારણે બિશ્નાઈ સમાજ ખૂબ જ દુખી છે.