ભાવનગરમાં યોગાસન સ્પોર્ટ્સ ચેમ્પ્યનશીપ સ્પર્ધા યોજાઇ

ભાવનગર યોગાસન સ્પોર્ટ્સ એસોસીએશન દ્વારા રવિવારે ભાવનગર યોગાસન સ્પોર્ટ્સ ચેમ્પ્યનશીપ ૨૦૨૨-૨૩ સ્પર્ધાનું આયોજન આર્યસમાજ સરદારનગર ખાતે કરવામાં આવ્યું હતું. આ સ્પર્ધામાં ૭૦ થી વધુ ખેલાડીઓએ કુલ ૧૨૦ સ્પર્ધા માં ભાગ લીધો હતો. જેમાં અલગ અલગ સ્પર્ધામાં વિજેતા ખેલાડીઓને અનુક્રમે ગોલ્ડ, સિલ્વર અને બ્રોન્ઝ ના કુલ ૧૦૮ મેડલોથી સન્માનિત કરવામાં આવ્યા હતા.

આ સ્પર્ધા શરૂ કરાવતા કલેકટરશ્રી યોગેશ નિરગુડે એ જણાવ્યું હતું કે તંદુરસ્ત રહેવા માટે યોગને જીવનનો ભાગ બનાવવો જોઈએ. નિરંતર યોગ કરવાથી શરીર ચુસ્ત અને સ્ફૂર્તિવાળું રહે છે. યોગથી દીવસની શરૂઆત કરનાર આખો દીવસ સ્ફૂર્તિનો અનુભવ કરે છે.

કાર્યક્રમનાં સમાપનમાં ભાવનગરના મેયરશ્રી કિર્તીબાળા દાણીધારિયા ઉપસ્થિત રહીને વિજેતાઓને સન્માનિત કર્યા હતા. આ તકે ભાવનગર યોગાસન સ્પોર્ટ્સ એસોસીએશનનાં શ્રી ચંદ્રસિંહજી ઝાલા, એસોસીએશનના પ્રમુખશ્રી હરેન્દ્રસિંહ ગોહિલ, એસોસીએશનનાં જોઇન્ટ સેક્રેટરીશ્રી મેધનાબા ઝાલા, એમ. કે. ભાવનગર .યુનિવર્સિટીના શા.શિ.નિયામકશ્રી દિલીપસિંહજી, ધર્મેન્દ્રસિંહ ગોહિલ, સ્પર્ધાના કો – ઓર્ડીનેટર ડૉ. ડી.વી.ગોહિલ, કોમ્પીટીશન ડાયરેકટશ્રી રાજેન્દ્રસિંહ ગોહિલ અને ઓર્ગેનાઇઝર શ્રી જીગ્નેશ પટેલ ઉપસ્થિત રહ્યા હતા.