રાજકોટમાં આવકવેરા વિભાગના દરોડાથી ખળભળાટ, ૧૫૦ જેટલા અધિકારીઓની ટીમ ત્રાટકી

આવકવેરા વિભાગે રાજકોટમાં ટોચની બિલ્ડર્સ લોબી પર મેગા સર્ચ ઓપરેશન હાથ ધર્યું છે. સૌરાષ્ટ્રના ઓરબીટ ગ્રુપના વિનેશ પટેલ અને જાણીતા બિલ્ડર દિલીપ લાડાણી સહિત તેમની સાથે સંકળાયેલા ભાગીદારોને ત્યાં આવકવેરા વિભાગના દરોડાથી ખળભળાટ મચી જવા પામ્યો છે. ૧૫૦ જેટલા અધિકારીઓની ટીમ દ્વારા ઓરબીટ ગ્રુપના તેમજ લાડાણી એસોસિએટના અલગ-અલગ પ્રોજેકટમાં રોકાણ કરનાર ફાયનાન્સરો તેમજ ભાગીદારોને ત્યાં આવકવેરા વિભાગની ટીમ વહેલી સવારે ત્રાટકી હતી અને સર્ચ ઓપરેશન હાથ ધરવામાં આવ્યું છે.

રાજકોટ આવકવેરા વિભાગની ઇન્વેસ્ટીગેશન વિંગ કમિશનરના નેતૃત્વ હેઠળ વહેલી સવારથી રાજકોટમાં આશરે ૧૫ જેટલી જગ્યાઓ પર ટીમ ત્રાટકી હતી. વહેલી સવારે ૬ વાગ્યે જ આવકવેરા વિભાગની ટીમે દિલીપ લાડાણી અને વિનેશ પટેલ તેમજ તેના ભાગીદારોને ત્યાં પહોંચીને સર્ચ ઓપરેશન હાથ ધરી દીધું છે. ઓરબીટ ગ્રુપના અલગ-અલગ પ્રોજેકટ જેમ કે, ઓર્બીટ ટાવર, ઓર્બીટ રોયલ ગાર્ડન સહિતના પ્રોજેકટ. આ પ્રોજેકટમાં રહેલા તેમના ભાગીદાર અને જાણીતા બિલ્ડર દિલીપ લાડાણી અને તેના ટ્‌વીન ટાવર પ્રોજેકટમાં ભાગીદાર રહેલા મયુર રાદડિયા, દાનુભા જાડેજા, ફાયનાન્સર મહિપતસિંહ ચુડાસમા સહિત સંકળાયેલા અનેક લોકો ઇન્કમટેકસની રડારમાં આવી ગયા છે અને વિવિધ પ્રોજેકટની ઓફિસ, બિલ્ડરોના નિવાસસ્થાન સહિતની ૧૫થી વધુ જગ્યાએ કાર્યવાહી ચાલી રહી છે.

આજે બિલ્ડર લોબીને આવકવેરા વિભાગે સાણસામાં લેતા સૌરાષ્ટ્રભરમાં બિલ્ડરો અને ફાયનાન્સરો તેમજ રીયલ એસ્ટેટના ધંધાર્થીઓમાં ફફડાટ ફેલાઈ ગયો છે.સમગ્ર ઓપરેશનને ઇન્વેસ્ટિગેશન વિંગના અધિકારી આદર્શ તિવારી લીડ કરી રહ્યા છે. આજના દરોડામાં રાજકોટ, જુનાગઢ, જામનગર, અમદાવાદ, વડોદરા અને સુરતના અધિકારીઓની ટીમ પણ જાેડાઈ છે. આ અગાઉ સપ્ટેમ્બર ૨૦૧૮માં પણ આવકવેરા વિભાગ દ્વારા લાડાણી ગ્રુપને ત્યાં સર્ચ ઓપરેશન હાથ ધરવામાં આવ્યું હતું.