સંગીત પ્રત્યે રુચી પિતા અને મોટાભાઈને જાેઈને જાગીઃ જિગ્નેશ બારોટ

લોક-ડાયરાથી લઈને પ્રેમના ગીતો ને સ્વરબદ્ધ કરીને મ્યુઝિક વીડિયો બનાવવા સુધીની સફર ખેડનાર સફળ ગુજરાતી ગાયક જિગ્નેશ બારોટ ‘જિગ્નેશ કવિરાજ’ના હુલામણા નામથી પણ ઓળખાય છે. આ વર્ષે ગુજરાત પહેલા તેઓ  લંડનમાં ગુજરાતી સમાજના નવરાત્રિ સેલિબ્રેશનમાં પરફોર્મ કરી ચૂક્યા છે. સંગીત ક્ષેત્રે આગળ વધવા માટે જિગ્નેશને તેના પિતા અને મોટાભાઈ તરફથી પ્રેરણા મળી હતી અને તેમના કારણે જ જિગ્નેશ આજે વિશ્વભરમાં પોતાના આગવા અવાજ અને પરફોર્મન્સના કારણે જાણીતા બન્યા છે. પોતાના કરિયર વિશે જિગ્નેશનું કહેવું છે કે, હું એક લગ્ન ગીતના પ્રોગ્રામમાં પરફોર્મ કરી રહ્યો હતો અને તે સમયે આરોહી સ્ટુડિયોના  કમલેશભાઈ વૈધ હાજર હતા અને તેમણે મારું પરફોર્મન્સ વખાણ્યું હતું. ફક્ત ૧૩ વર્ષની ઉંમરે જ તેમણે મને પહેલો બ્રેક આપ્યો હતો અને મારી કેસેટ લોન્ચ થઈ હતી. ત્યારપછી અનેક લોક-ડાયરા અને ગીતો માં મને મારા ફેન્સ તરફથી ખૂબ જ પ્રેમ મળ્યો છે.

હું જાણું છું કે, મારા ફેન્સને બ્રેકઅપ સોંગ એટલે કે સ્પેશ્યલી ઈમોશનલ સોગ્સ ખૂબ જ ગમે છે અને આ કારણે જ હું મારા કામમાં તેવા ગીતોને સામેલ કરું છું. જિગ્નેશ કવિરાજમાંથી જિગ્નેશ બારોટ બનેલા આ સિંગરનું કહેવું છે કે, મારું સાચું નામ જિગ્નેશ બારોટ છે પરંતુ લોકોએ પ્રેમથી મારું નામ ‘કવિરાજ’ પાડયું છે. આ કારણે, મારા યુ. એસ.ના  વિઝા રિજેક્ટ થયા હતા  અને તેથી જ મેં મારી ડિજિટલ મ્યુઝિક ચેનલ  જિગ્નેશ બારોટના નામથી શરૂ કરી છે. આ વર્ષે નવરાત્રિમાં જિગ્નેશ બારોટ  ‘સિદ્ધિવિનાયક ઈવેન્ટ્‌સ એન્ડ હોલીડે’ અને ‘મા ઈવેન્ટ મેનેજમેન્ટ’ દ્વારા આયોજિત ‘મા નવરાત્રિ ૨૦૨૨’ માં નવે નવ દિવસ સિંધુભવન સ્થિત રાધિકા પાર્ટી પ્લોટ માં પર્ફોર્મ કરવાના છે અને પરફોર્મની સાથે દરરોજ અલગ-અલગ થીમ પણ ગરબાનું આયોજન કરવામાં આવ્યું છે અને આ વર્ષે જિગ્નેશ, તેણે તૈયાર કરેલા નવા સોંગ્સ પર ખેલૈયાઓને ઝુમાવવા તૈયાર છે.