સમજૂતીની અસર લદ્દાખમાં દેખાઈ, ચીને કહ્યું,”સૈનિકો હટાવવાનું કામ ચાલી રહ્યું છે”

ભારત અને ચીન વચ્ચેના કરારની અસર પૂર્વ લદ્દાખમાં દેખાવા લાગી છે. વાસ્તવિક નિયંત્રણ રેખા (ન્છઝ્ર) પાસે બંને દેશોના સૈનિકો પાછા હટાવવાનું શરૂ થઈ ગયું છે. આ અંગે ચીનનું નિવેદન પણ સામે આવ્યું છે. ચીને કહ્યું કે સમજૂતી હેઠળ બંને દેશોની સેના પોતાના સૈનિકોની વાપસીમાં લાગેલી છે અને આ પ્રક્રિયા સરળતાથી ચાલી રહી છે. ભારતીય સૈન્યના સૂત્રોના જણાવ્યા અનુસાર, સૈનિકો પાછા ખેંચવાની પ્રક્રિયા પૂર્ણ થયા પછી, બંને સંઘર્ષના સ્થળો પર પેટ્રોલિંગ શરૂ થશે અને બંને પક્ષો તેમના સૈનિકોને પાછા ખેંચી લેશે અને અસ્થાયી માળખાને નષ્ટ કરશે. આ કરાર ફક્ત આ બે સંઘર્ષ બિંદુઓ, ડેમચોક અને ડેપસાંગ માટે થયો છે. અન્ય ક્ષેત્રો માટે હજુ પણ વાટાઘાટો ચાલુ છે. સૂત્રોએ જણાવ્યું કે ભારત અને ચીને પૂર્વી લદ્દાખના ડેમચોક અને ડેપસાંગ મેદાનોમાંના બે સંઘર્ષ બિંદુઓથી સૈનિકોને પાછા હટાવવાનું શરૂ કરી દીધું છે અને આ પ્રક્રિયા ૨૮-૨૯ ઓક્ટોબર સુધીમાં પૂર્ણ થવાની સંભાવના છે.

સેનાના સૂત્રોનું કહેવું છે કે ૨૮-૨૯ ઓક્ટોબર સુધીમાં ભારત અને ચીનના સૈનિકો ડેમચોક અને ડેપસાંગથી સંપૂર્ણપણે પીછેહઠ કરશે. છૂટા થયા પછી, ગ્રાઉન્ડ કમાન્ડરોની બેઠકો થશે. પેટ્રોલિંગ દરમિયાન કોઈપણ પ્રકારની ગેરસમજ ન થાય તે માટે અમે પેટ્રોલિંગમાં જઈશું ત્યારે બંને પક્ષોને જણાવવામાં આવશે. ૨૩ ઓક્ટોબરના રોજ પીએમ મોદીએ રશિયાના કઝાનમાં બ્રિક્સ સંમેલન દરમિયાન ચીનના રાષ્ટ્રપતિ શી જિનપિંગ સાથે દ્વિપક્ષીય બેઠક કરી હતી. આ દરમિયાન, તેમણે પૂર્વી લદ્દાખમાં ન્છઝ્ર સાથે સૈનિકો પાછા ખેંચવા અને પેટ્રોલિંગ સંબંધિત કરારને મંજૂરી આપી હતી. ભારતે ૨૧ ઓક્ટોબરે ચીન સાથે આ કરારની જાહેરાત કરી હતી. જૂન ૨૦૨૦ માં, ગલવાન ખીણમાં બંને દેશોના સૈનિકો વચ્ચે ભીષણ અથડામણ પછી સંબંધો વણસ્યા હતા. છેલ્લા કેટલાક દાયકાઓમાં બંને પક્ષો વચ્ચેનો આ સૌથી ગંભીર સૈન્ય સંઘર્ષ હતો.