સાચા એવોર્ડ તો નેશનલ એવોર્ડ્‌સ છે, ઓસ્કાર નહીં : પાન નલિન

આ વર્ષે ગુજરાતી ફિલ્મો ફક્ત બોક્સ ઓફિસના આંકડાની દ્રષ્ટિએ જ નહીં, પરંતુ કન્ટેન્ટની દ્રષ્ટિએ પણ ચર્ચામાં છે. ધીરે-ધીરે બોલીવૂડના મોટા ફિલ્મ પ્રોડક્શન હાઉસ ગુજરાતી ભાષાની ફિલ્મોને પ્રાધાન્ય આપી રહ્યા છે. એટલે જ, આ વર્ષે અવનવા વિષયો સાથેની અનેક ગુજરાતી ફિલ્મો થિયેટર્સમાં રિલીઝ થઈ ચૂકી છે. નલિન પંડ્યા એટલે કે, પાન નલિનના હુલામણા નામથી ઓળખાતા વિશ્વના ખ્યાતનામ નિર્દેશકની ફિલ્મ ‘લાસ્ટ ફિલ્મ શો’(છેલ્લો શો) આ વર્ષે ૯૫મા ઓસ્કાર એવોર્ડ માટે ભારત તરફથી ઓફિશિયલ એન્ટ્રી બની છે અને ગત શુક્રવારે ભારતીય સિનેમાઘરોમાં રિલીઝ થઈ છે. ફિલ્મને પ્રમોટ કરવા માટે પાન નલિન અમદાવાદ પહોંચ્યા હતા અને તેમણે ફિલ્મ વિશે અને તેમની પર્સનલ લાઈફ વિશે અનેક જાણી-અજાણી વાતો નવગુજરાત સમય સાથે શેર કરી હતી. પાન નલિન સાથેની ખાસ વાતચીતના કેટલાક અંશ. ફિલ્મ વિશે પાન નલિને કહ્યું હતું કે, હું નાનપણથી સિનેમા પ્રત્યે આકર્ષિત હતો.

એક નાનકડા ગામમાં મારો જન્મ થયો હતો. ફિલ્મો તરફ મારી વિશેષ રુચિ હતી. વર્ષ ૨૦૧૦માં જયારે રીલ સિનેમાનો અંત આવ્યો ત્યારબાદ, ફિલ્મોના એક સુવર્ણ કાળનો અંત આવ્યો હતો. હું છેલ્લા કેટલાક સમયથી આ વિષય પર કામ કરવાનું વિચારી રહ્યો હતો. ફિલ્મોના થીએટર રિલીઝ માટે જ્યારથી ટેક્નોલોજીનો ઉપયોગ થવા લાગ્યો તે સમયે અનેક લોકો બેકાર થઈ ગયા હતા. તમે આ ફિલ્મને મારા જીવનનો એક અભિન્ન ભાગ પણ ગણી શકો છો. મોટા ભાગના દ્રષ્ટાંત જે પ્રમાણે આ ફિલ્મમાં દર્શાવવામાં આવ્યા છે તે મારી લાઈફ અને પર્સનલ અનુભવોથી ઈન્સ્પાયર્ડ છે. ફિલ્મનું કાસ્ટિંગ ઘણું ઈન્ટરેસ્ટિંગ છે, ફિલ્મમાં મ્યુનિસિપલ સ્કૂલમાં અભ્યાસ કરતાં બાળકોને કાસ્ટ કરવામાં આવ્યા છે.

આ બાળકોના સિલેક્શન વિશે તેમનું કહેવું છે કે, અમે ટેલેન્ટેડ અને અનુભવી બાળકોને ‘લાસ્ટ ફિલ્મ શો’ ફિલ્મમાં કાસ્ટ કરવાની ઘણી કોશિશ કરી. અમે વિવિધ શહેરોમાં અનેક ઓડિશન રાઉન્ડ કર્યા હતા, પરંતુ અમારી શોધ પૂરી થઈ નહોતી. એક સમયે અમારી ટીમને માહિતી મળી કે, સૌરાષ્ટ્રના ગામોમાં ભણતા મ્યુનિસિપલ બાળકો પણ ટેલેન્ટેડ છે પણ તેઓ ફિલ્મી દુનિયાથી દૂર છે. અમે ઓડિશન લીધું તો અમને આ નાના બાળકોમાં રૉ ટેલેન્ટ જાેવા મળ્યું અને અનેક વર્કશોપ દ્વારા તેમનું ટેલેન્ટ એક નવી ઉંચાઈ સુધી પહોંચ્યું પછી અમે આ બાળકોને ફિલ્મમાં કાસ્ટ કર્યા. ફિલ્મોના વિવિધ વિષય અને નોન-કોમર્શિયલ અને કોમર્શિયલ સિનેમા વિશેના સવાલ પર પાન નલિને જણાવ્યું હતું કે, હું તેમાં નથી માનતો. આપણી સંસ્કૃતિ અને આપણાં દેશ જેટલું સાહિત્ય વિશ્વભરમાં ક્યાંય નથી. હું કોમર્શિયલ અને નોન-કોમર્શિયલ ફિલ્મોમાં કોઈ ભેદભાવ હોય છે તે નથી માનતો.

હું મને ગમતી અને મને જે વિષય ટચ કરી જાય છે તેવી પર ફિલ્મો બનાવું છું. અમારી ફિલ્મ ‘લાસ્ટ ફિલ્મ શો’ ભારત તરફથી ઓસ્કાર માટે ઓફિશિયલ એન્ટ્રી બની છે, તે વાતથી મને ખુશી છે, પરંતુ જાે તમે વિચારો તો, ઓસ્કાર ખરેખર તો હોલિવૂડના એવોર્ડ છે અને આપણા માટે સાચા એવોર્ડ તો નેશનલ ફિલ્મ ફેસ્ટિવલ છે. ઈન્ટરનેશનલ ફિલ્મ કેટેગરી તો ઓસ્કાર એવોર્ડનો એક નાનો ભાગ છે. આજકાલ ફિલ્મોને લઈને થતાં બોયકોટ વિવાદ પર તેમણે કહ્યું હતું કે, કોઈપણ આર્ટિસ્ટ તેની ક્રિએટિવિટીથી તેના ફિલ્ડમાં કામ કરે છે.

મારી વર્ષ ૨૦૧૫માં રિલીઝ થયેલી ફિલ્મ ‘એન્ગ્રી ઈન્ડિયન ગોડેસીસ’ વિશે ખાસ્સો વિવાદ થયો હતો. આ ફિલ્મમાં મારો આશય કોઈનું અપમાન કરવાનો નહોતો, પરંતુ લોકોએ  તેનો સમજ્યા વગર જ વિરોધ કર્યો હતો. તમે આજે જાેઈ શકો છો કે, તે ફિલ્મની વૈશ્વિક સ્તર પર કેટલી પ્રશંસા થઈ છે અને ફિલ્મ ‘લાસ્ટ ફિલ્મ શો’ પણ વિશ્વભરની વાહવાહી અને અનેક મહત્વના એવોર્ડ મેળવીને ભારત પહોંચી છે. અહીં જે પ્રકારે ફિલ્મને પ્રેમ મળી રહ્યો છે તે જાેઈને અમારી સમગ્ર ફિલ્મ ટીમ ખુશ છે.