સુરત ગ્રામ્ય પોલીસ હેડક્વાર્ટર માંથી નજરકેદ માં રખાયેલી ચાર બાંગ્લાદેશી મહિલા ફરાર

સુરત જિલ્લાના પોલીસ હેડક્વાર્ટરના શેલ્ટર હોમમાંથી ચાર બાંગ્લાદેશી મહિલાઓ ફરાર થઈ જતાં સુરત ગ્રામ્ય પોલીસ દોડતી થઈ ગઈ છે. દસ મહિના પહેલા કામરેજ પોલીસ સ્ટેશનમાં નોંધાયેલા ગુનામાં ચાર મહિલાઓને શેલ્ટર હોમમાં રાખવામાં આવી હતી.      

   આ અંગે મળતી માહિતી અનુસાર 12મી ઓગસ્ટ 2021ના રોજ મુંબઈ ક્રાઇમ બ્રાન્ચે શહેર પોલીસની મદદથી પરવત પાટિયાની ચંદ્રલોક સોસાયટીમાંથી પાંચ બાંગ્લાદેશીઓને પકડી પાડ્યા હતા. આ બાંગ્લાદેશી નાગરિકો 2012માં બોર્ડર પાર કરીને ભારતમાં પ્રવેશ્યા હતા અને ત્યારબાદ ગુજરાતના સુરત જિલ્લામાં  આવી કામરેજ તાલુકાનાં ખોલવડ ખાતે બોગસ દસ્તાવેજના આધારે આધારકાર્ડ, પાનકાર્ડ અને પાસપોર્ટ બનાવી લીધા હતા. જે અંગે લિંબાયત પોલીસે કામરેજ પોલીસ મથકમાં ગુનો નોંધાવ્યો હતો. જેની તપાસ સુરત જિલ્લા SOG કરી રહી હતી. પોલીસે ચાર મહિલા સહિત પાંચની ધરપકડ કરી હતી. તેમને પરત બાંગ્લાદેશ મોકલવાની તૈયારી ચાલી રહી હોય ઘલુડી પોલીસ હેડક્વાટરના શેલ્ટર હોમમાં નજરકેદ રાખવામાં આવ્યા હતા. શુક્રવારે સવારના સમયે પોલીસની નજર ચૂકવી બાંગ્લાદેશી ચાર મહિલાઓ હેડક્વાટરથી ફરાર થઈ ગઈ હતી. નજરકેદ મહિલાઓ ફરાર થઈ હોવાની જાણ થતાં જ જિલ્લા પોલીસે હરકતમાં આવી તપાસ શરૂ કરી છે.