શાહરુખ ખાન યુએસએ ટી-૨૦ લીગમાં લોસ એન્જેલસ નાઇટ રાઇડર્સનો માલિક બનશે

બોલિવૂડ સ્ટાર શાહરુખ ખાને અમેરિકામાં ક્રિકેટને પ્રોત્સાહન આપવાને લઈ ઈન્વેસ્ટ કરવાનો પ્લાન બનાવ્યો છે. તે ઇન્ડિયન પ્રીમિયર લીગ અને કેરેબિયન પ્રીમિયર લીગ પછી હવે યુએસએ ટી-૨૦ લીગમાં પણ ટીમ ખરીદશે. તે લોસ એન્જેલસ નાઇટ રાઇડર્સ ટીમનો માલિક બનશે.
અમેરિકન ક્રિકેટ એન્ટરપ્રાઈઝએ પણ નાઈટ રાઈડર્સ ફ્રેન્ચાઈઝમાં ઈન્વેસ્ટ કરવાની વાત કન્ફર્મ કરી છે. અમેરિકન ટી-૨૦ લીગમાં ૬ ટીમ હશે.
આ ટીમો ન્યૂયોર્ક, સેન ફ્રાન્સિસ્કો, વોશિંગ્ટન ડીસી, શિકાગો, ડલાસ અને લોસ એન્જેલસ હશે. સૂત્રો અનુસાર, આ ટૂર્નામેન્ટ ૨૦૨૨માં શરૂ થશે. શાહરુખ આઈપીએલમાં કોલકાતા નાઈટ રાઈડર્સ અને સીપીએલમાં ત્રિનિદાદ એન્ડ ટોબેગો નાઈટ રાઈડર્સ ટીમના માલિક છે. કેકેઆર બે વાર ૨૦૧૨ અને ૨૦૧૪માં ટાઇટલ જીતી, જ્યારે ટીકેબી ૪ વાર ૨૦૨૦, ૨૦૧૮, ૨૦૧૭ અને ૨૦૧૫માં સીપીએલ ચેમ્પિયન રહી છે.
તાજેતરમાં જ શાહરુખે એક મીડિયા ઇન્ટરવ્યુમાં કહ્યું હતું કે છેલ્લા કેટલાક સમયથી અમે નાઈટ રાઈડર્સ ફ્રેન્ચાઈઝને ગ્લોબલ રીતે આગળ વધવાની તક શોધી રહ્યા છીએ. એને લીધે જ અમે યુએસએમાં શરૂ થનાર ટી-૨૦ લીગ ઓર્ગેનાઇઝર્સના સંપર્કમાં પણ હતા. હું તમને જણાવી દઉં કે દુનિયામાં ક્યાંયપણ મોટી ક્રિકેટ લીગ થાય, અમે ત્યાં ઈન્વેસ્ટ કરવાની તક શોધીશું.