North Korea Corona Explosion: ઉત્તર કોરિયાના તાનાશાહ કિમ જોંગ ઉનની કાબૂથી બહાર કોરોના, મહામારી સામે લડવા સેનાને નિર્દેશ

નોર્થ કોરિયામાં કોરોનાના વધતા કેસ વચ્ચે સોમવારે તાવના કારણે મૃત્યુના વધુ 8 કેસ નોંધાયા છે, જ્યારે 3,92,920 વધુ લોકોને તાવ આવ્યો હતો. દેશના નેતા કિમ જોંગ-ઉને દવાઓના પુરવઠામાં વિલંબ માટે અધિકારીઓને ઠપકો આપ્યો છે અને રાજધાની પ્યોંગયાંગમાં વૈશ્વિક મહામારીને પહોંચી વળવા માટે સૈન્યને પગલાં લેવાનો નિર્દેશ આપ્યો છે.

એપ્રિલથી 12 લાખ બીમાર

ઉત્તર કોરિયાના એન્ટિ-વાયરસ ઇમરજન્સી હેડક્વાર્ટરના અહેવાલ મુજબ એપ્રિલના અંતથી અત્યાર સુધીમાં 1.2 મિલિયન લોકોને તાવ આવ્યો છે, જેમાંથી 5,64,860 લોકો હજુ પણ આઇસોલેશનમાં જીવી રહ્યા છે. હેડક્વાર્ટરના જણાવ્યા અનુસાર, રવિવારે સાંજે 6 વાગ્યા સુધી વધુ 24 લોકોના મોત બાદ દેશમાં મૃત્યુઆંક વધીને 50 થઈ ગયો છે. જો કે, રાજ્ય મીડિયાએ પુષ્ટિ કરી નથી કે તાવથી પીડાતા અને જીવ ગુમાવનારાઓમાંથી કેટલા કોરોના વાયરસથી સંક્રમિત હતા.

સરમુખત્યારે રસી કાર્યક્રમને ફગાવી દીધો હતો.

નિષ્ણાંતોનું કહેવું છે કે ઉત્તર કોરિયાની નબળી સ્વાસ્થ્ય વ્યવસ્થાને કારણે વાયરસના સંક્રમણને રોકવામાં નિષ્ફળતા તેના માટે ખતરનાક સાબિત થઈ શકે છે. એવું કહેવાય છે કે 2.6 કરોડની વસ્તીવાળા દેશમાં મોટાભાગના લોકોને કોવિડ-19 સામે રસી આપવામાં આવી નથી. ઉત્તર કોરિયાએ સંયુક્ત રાષ્ટ્ર સમર્થિત ‘કોવેક્સ’ રસી વિતરણ કાર્યક્રમની મદદ લેવાની ઓફર પણ ઠુકરાવી દીધી. કોવિડ-19 વૈશ્વિક રોગચાળા ફાટી નીકળ્યાના બે વર્ષથી વધુ સમય બાદ ઉત્તર કોરિયાએ ગુરુવારે કોરાનાના પ્રથમ કેસની પુષ્ટિ કરી હતી.