ગૃહ મંત્રાલયના નિયામક ખેડૂત આગેવાનને મળ્યા

ગૃહ મંત્રાલયના નિયામક મયંક મિશ્રાએ ખનૌરી બોર્ડર પર છેલ્લા ૨૦ દિવસથી આમરણાંત ઉપવાસ પર બેઠેલા ખેડૂત નેતાને મળ્યા હતા. ખનૌરી બોર્ડર પર ૨૬ નવેમ્બરથી ઉપવાસ પર બેઠેલા જગજીત સિંહ દલ્લેવાલની તબિયત બગડવા લાગી છે. સુપ્રીમ કોર્ટે આ મામલાની નોંધ લીધા બાદ આજે (રવિવારે) ગૃહ મંત્રાલયના ડિરેક્ટર મયંક મિશ્રા અને પંજાબના પોલીસ મહાનિર્દેશક ગૌરવ યાદવ ખેડૂત નેતા દલ્લેવાલને મળવા આવ્યા હતા. અહીં તેમણે તેમના સ્વાસ્થ્ય વિશે પૂછપરછ કરી હતી. આ દરમિયાન ખેડૂત સંગઠનના આગેવાનો અને પોલીસ અધિકારીઓ વચ્ચે બેઠક યોજાઈ હતી. ખનૌરી બોર્ડર પર ખેડૂત નેતાઓને મળ્યા પછી, ગૃહ મંત્રાલયના ડિરેક્ટર મયંક મિશ્રાએ કહ્યું કે અમે ખેડૂત નેતાઓની તમામ માંગણીઓ સાંભળી છે. હું સુપ્રીમ કોર્ટના નિર્દેશોનું પાલન કરવા આવ્યો છું.

શનિવારે કેન્દ્રીય ગૃહ પ્રધાન અમિત શાહ અને કેન્દ્રીય કૃષિ પ્રધાન શિવરાજ ચૌહાણ સાથે બેઠક યોજાઈ હતી. જે બાદ ડાયરેક્ટર મયંક મિશ્રા ખેડૂત નેતાને મળ્યા હતા. આવી સ્થિતિમાં, એવું માનવામાં આવે છે કે હવે ખેડૂતો અને સરકાર વચ્ચે વાતચીતના માર્ગો ખુલશે. પંજાબ ડીજીપીએ કહ્યું કે અમે જગજીત સિંહ દલ્લેવાલની હાલત વિશે માહિતી મેળવી છે. મુખ્યમંત્રી ભગવંત સિંહ માન તેમના સ્વાસ્થ્યને લઈને ખૂબ જ ચિંતિત છે. અમે તેમનો સંદેશ તેમને પહોંચાડ્યો છે. અમે તેમની સાથે સંકલન કરીને આ સમસ્યાનો ઉકેલ લાવવાનો પ્રયાસ કરી રહ્યા છીએ.

ડીજીપીએ કહ્યું કે સુપ્રીમ કોર્ટના આદેશ મુજબ અમે દલ્લેવાલ અને તેમના સહયોગીઓને ઈમરજન્સી મેડિકલ સહાય પૂરી પાડવા માટે અપીલ કરી હતી. જગજીત સિંહ દલ્લેવાલ સાહેબનું જીવન ખૂબ જ કિંમતી છે. તેના માટે અહીં (ખનૌરી બોર્ડર) રહીને શાંતિપૂર્ણ રીતે આ આંદોલનનું નેતૃત્વ કરવું ખૂબ જ મહત્વપૂર્ણ છે. ખેડૂત નેતા જગજીત સિંહ દલ્લેવાલ ૨૬ નવેમ્બરથી ખનૌરી બોર્ડર પર આમરણાંત ઉપવાસ પર છે, છેલ્લા ૩-૪ દિવસથી તેમની હાલત સતત બગડી રહી છે. સુનાવણી દરમિયાન સુપ્રીમ કોર્ટે કહ્યું કે ખેડૂત નેતા દલ્લેવાલ સાથે વાત કરવામાં આવે અને તેમના ઉપવાસ ખતમ કરવામાં આવે. જે બાદ આજે અધિકારીઓ તેમને મળવા પહોંચ્યા હતા. દલ્લેવાલની નાદુરસ્ત તબિયતના સમાચાર મળતા જ અનેક નેતાઓ તેમને મળવા પહોંચ્યા હતા. શંભુ બોર્ડર પર ઉભેલા ખેડૂતોએ ગઈકાલે ત્રીજી વખત દિલ્હી તરફ કૂચ કરવાનો પ્રયાસ કર્યો હતો. પરંતુ પોલીસે વોટર કેનન અને ટીયર ગેસના શેલ છોડીને તેમને અટકાવ્યા હતા. પોલીસની આ કાર્યવાહીમાં અનેક ખેડૂતો ઘાયલ થયા હતા.