મતદાર યાદી ખાસ સઘન સુધારણા કાર્યક્રમ – ૨૦૨૬, અમરેલી જિલ્લાની પાંચ વિધાનસભાના વિસ્તારના ૮ લાખથી વધુ એન્યુમરેશન ફોર્મ ડિજિટાઇઝ થયા : ૬૪ ટકા કામગીરી પૂર્ણ

ભારતના ચૂંટણી પંચ, નવી દિલ્હીના દ્વારા  તા.૦૧.૦૧.૨૦૨૬ની લાયકાતની તારીખના સંદર્ભમાં મતદારયાદી ખાસ સઘન સુધારણા કાર્યકમ-૨૦૨૬ જાહેર કરવામાં આવ્યો છે. જે તા.૨૮.૧૦.૨૦૨૫ થી શરૂ થઈ તા.૦૭.૦૨.૨૦૨૬ સુધી જાહેર થયો છે.

અમરેલી જિલ્લામાં સમાવિષ્ટ કુલ ૦૫ વિધાનસભા મતદાર વિભાગ (૯૪-ઘારી, ૯૫-અમરેલી, ૯૬-લાઠી, ૯૭-સાવરકુંડલા તથા ૯૮-રાજુલા)ના કૂલ ૧૨૭૧૩૭૫ મતદારોના એન્યુમરેશન ફોર્મ વિતરણ કરવામાં આવ્યું છે, જે પૈકી ૮ લાખથી વધુ ફોર્મ બી.એલ.ઓ.શ્રી દ્વારા પરત મેળવી તેમને ડિજિટાઇઝ કરવામાં આવેલ છે. આમ, આ કામગીરી અમરેલી જિલ્લામાં હાલ ૬૪.૧૭ % પૂર્ણ કરવામાં આવી છે. બાકી રહેતા ફોર્મ પરત મેળવવાની કામગીરી ચાલુમાં છે. જે ફોર્મ સત્વરે પરત મેળવી તેને પણ ડિજિટાઇઝ કરવામાં આવશે.

આ ઉપરાંત જે મતદારોએ ફોર્મ પરત જમા કરાવેલ નથી, તેવા મતદારો પોતાના ફોર્મ આગામી તા.૨૯/૧૧/૨૦૨૫ તથા તા.૩૦/૧૧/૨૦૨૫ ના રોજ સંબંધિત મામલતદાર કચેરીઓ ખાતે જમા કરાવી શકશે. વહીવટી તંત્ર તરફથી આ માટે મામલતદાર કચેરીઓ ખાતે જરૂરી વ્યવસ્થા કરવામાં આવનાર છે. આથી અમરેલી જિલ્લાના સામાન્ય રહિશ હોય તેવા તમામ મતદારોને પોતાનું ફોર્મ સત્વરે જમા કરાવી BLOશ્રીને સહકાર આપવા માટે જિલ્લા ચૂંટણી અધિકારી અને કલેકટરશ્રી, અમરેલી દ્વારા અનુરોધ કરવામાં આવે છે. તેમ નાયબ જિલ્લા ચૂંટણી અધિકારીશ્રીની યાદીમાં જણાવ્યું છે.