સાવરકુંડલામાં RSS પ્રેરિત ડો હેડગેવાર સેવા સમિતિ દ્વારા ‘સેવાભવન’નો ભૂમિપૂજન કાર્યક્રમ સંપન્ન

*રાષ્ટ્ર કાર્ય માટે આહ્વાન વ્યક્તિગત સફળતા સાથે રાષ્ટ્રની પ્રગતિમાં યોગદાન આપવું એ ધર્મ છે*

 *સૌરાષ્ટ્ર પ્રાંત સંઘચાલક મુકેશભાઈ મલકાને દરેક વ્યક્તિને રાષ્ટ્રની પ્રગતિમાં યોગદાન આપવા પર ભાર મૂક્યો*.

રાષ્ટ્રીય સ્વયંસેવક સંઘ (RSS) પ્રેરિત ડો. હેડગેવાર સેવા સમિતિ દ્વારા સાવરકુંડલા ખાતે નિર્માણ પામનારા ‘સેવાભવન’ ના ભૂમિપૂજન કાર્યક્રમનું ગતરોજ ધર્મ અને રાષ્ટ્રભક્તિના અદમ્ય ઉત્સાહ સાથે ભવ્ય આયોજન કરવામાં આવ્યું હતું.

આ પવિત્ર અવસરે સંતો-મહંતોની ઉપસ્થિતિમાં શાસ્ત્રોક્ત અને વૈદિક મંત્રોચ્ચાર સાથે ભૂમિપૂજન વિધિ સંપન્ન કરવામાં આવી હતી.

મહાનુભાવોની ગરિમામય ઉપસ્થિતિ આ કાર્યક્રમમાં રાષ્ટ્ર અને સમાજ સેવામાં યોગદાન આપતા અનેક મહાનુભાવોની વિશેષ ઉપસ્થિતિ રહી હતી. માનનીય શ્રી મુકેશભાઈ મલકાન સૌરાષ્ટ્ર પ્રાંત સંઘચાલક અને અગ્રણી ઉદ્યોગપતિ, શ્રી દેવેન્દ્રભાઈ દવે પ્રાંત સહકાર્યવાહ,  શ્રી માયાભાઈ આહીર સુપ્રસિદ્ધ લોકસાહિત્યકાર, અને તેમના ધર્મપત્ની.આ ઉપરાંત, સાવરકુંડલા શહેર અને આસપાસના વિસ્તારોના અગ્રણી ઉદ્યોગપતિઓ, વિવિધ સમાજના અગ્રણીઓ અને વિશાળ સંખ્યામાં રાષ્ટ્રપ્રેમી નાગરિકોની ગરિમામય ઉપસ્થિતિથી આ અવસર શોભાયમાન બન્યો હતો.

રાષ્ટ્ર નિર્માણ માટે પ્રેરક ઉદ્બોધન

કાર્યક્રમ દરમિયાન, મુખ્ય વક્તાઓએ રાષ્ટ્ર નિર્માણ અને સમાજ સેવાના મહત્વ પર ભાર મૂકતા પ્રેરક ઉદ્બોધનો કર્યા હતા સૌરાષ્ટ્ર પ્રાંત સંઘચાલક શ્રી મુકેશભાઈ મલકાન (ઉદ્યોગપતિ) એ દરેક વ્યક્તિને ‘રાષ્ટ્ર કાર્ય’ માટે આગળ આવવા માટે ભારપૂર્વક આહ્વાન કર્યું હતું. તેમણે જણાવ્યું કે, “વ્યક્તિગત સફળતાની સાથે સાથે રાષ્ટ્રની પ્રગતિમાં યોગદાન આપવું એ દરેક નાગરિકનો ધર્મ છે.”  લોકસાહિત્યકાર શ્રી માયાભાઈ આહીર એ તેમની આગવી શૈલીમાં ‘સજ્જન શક્તિ’ (સારી અને સકારાત્મક શક્તિ)ને સંગઠિત થઈને રાષ્ટ્રને વધુ મજબૂત અને સમૃદ્ધ બનાવવા માટેનું આહ્વાન કર્યું હતું. તેમણે લોકસાહિત્યના માધ્યમથી સમાજમાં સકારાત્મકતા અને એકતા ફેલાવવાના મહત્વ પર ભાર મૂક્યો હતો.

નવા બનનારા આ સેવાભવન દ્વારા ડો. હેડગેવાર સેવા સમિતિ સાવરકુંડલા અને આસપાસના વિસ્તારમાં વિવિધ સેવાકીય પ્રવૃત્તિઓનું આયોજન કરશે. આ ભવન સમાજના જરૂરિયાતમંદ વર્ગોને શિક્ષણ, આરોગ્ય અને સંસ્કાર આપવાના કેન્દ્ર તરીકે કાર્ય કરશે, જે રાષ્ટ્રસેવાના સંકલ્પને મૂર્તિમંત બનાવશે.

કાર્યક્રમના અંતે, સમિતિના હોદ્દેદારોએ તમામ અતિથિઓ, સંતો-મહંતો અને ઉપસ્થિત નાગરિકોનો આભાર વ્યક્ત કરીને સૌને રાષ્ટ્રનિર્માણના આ પવિત્ર કાર્યમાં સહયોગ આપવા વિનંતી કરી હતી. તેમ પત્રકાર યશપાલ વ્યાસ ની યાદીમાં જણાવેલ છે.