અમરેલી જિલ્લા નિવાસી અધિક કલેકટર શ્રી દિલિપસિંહ ગોહિલના અધ્યક્ષ સ્થાને જિલ્લા માર્ગ સલામતી સમિતિની બેઠક યોજાઈ હતી. આ બેઠકમાં નિવાસી અધિક કલેક્ટરશ્રીએ અમરેલી જિલ્લાની માર્ગ સલામતીની વિવિધ કામગીરી બાબતે વિસ્તૃત સમીક્ષા હાથ ધરી હતી.
બેઠકમાં સ્પીડ લિમિટ, નિયમ મુજબનાં સાઇનેઝ બોર્ડ લગાવવા, વૃક્ષનું યોગ્ય સમયે ટ્રીમીંગ કરાવવું, સ્પીડ બ્રેકર, રમ્બલ સ્ટ્રીપ, શેવરોન બોર્ડ, કેટ આઈઝ, વગેરેનો ઉપયોગ કરી રોડ અકસ્માત ઘટાડવા રોડ એન્જિનીયરીંગને લગત પગલાં લેવા બાબતે સંબંધિત અધિકારીશ્રીઓ સાથે વિસ્તૃત ચર્ચા કરવામાં આવી હતી.
વડીયા તાલુકામાં ચોકડી ચાર રસ્તાથી મોટી કુંકાવાવ સુધીના રોડ પર રીસરફેસીંગ કામગીરી પ્રગતિ તળે છે. સાવરકુંડલા-ભુવા-દામનગર રોડ પર સ્પીડબ્રેકર, થર્મોપ્લાસ્ટના પટ્ટા તેમજ રોડ સેફ્ટી લગત પગલા સહિતની કામગીરી પૂર્ણ કરવામાં આવી છે.
સપ્ટેમ્બર-૨૦૨૫ દરમિયાન અમરેલી જિલ્લા પોલીસ દ્વારા ટ્રાફીક લગત વિવિધ કામગીરી કરવામાં આવી હતી. જેમાં હેલ્મેટ, સીટ બેલ્ટ, રીફ્લેક્ટર, પી.યુ.સી સહિતની બાબતોને લઈને કાર્યવાહી કરવામાં આવી હતી. ઉપરાંત દંડ પણ કરવામાં આવ્યો હતો. વાહન ચલાવતી વખતે મોબાઈલ ફોનનો ઉપયોગ, અતિશય ઝડપે વાહન ચલાવવું વગેરે બાબતોને લઈને જનજાગૃત્તિલક્ષી કાર્યક્રમો પણ સમયાંતરે યોજવામાં આવી રહ્યા છે.
વાહન ચાલકો જાગૃત્ત બની વાહન ચલાવતી વખતે હેલ્મેટ પહેરે, સીટબેલ્ટ બાંધે તે જરૂરી છે. જિલ્લામાં અકસ્માત ન સર્જાય તે માટે વાહન ચાલકો પણ વધુ સ્પીડે વાહન ન ચલાવે તે જરૂરી છે.
માર્ગ સલામતી માટે અમરેલી જિલ્લાના વિવિધ રસ્તા પર આવશ્યકતા મુજબ જરુરી સૂચનાઓ સાથેના સાઈન બોર્ડ, સ્પીડ બ્રેકર, સ્પીડ લિમિટ દર્શાવતા બોર્ડ, રેડિયમ, માર્કિંગ પટ્ટા, બેરિયર લગાવવાની કામગીરીને નિયમિત રીતે થાય તે માટે નિવાસી અધિક કલેક્ટરશ્રીએ જરૂરી દિશાનિર્દેશો આપ્યા હતા.
માર્ગ સલામતી માટે વિવિધ કચેરીઓ દ્વારા થયેલી કામગીરીની સંકલિત વિગતો સહાયક પ્રાદેશિક વાહન વ્યવહાર અધિકારીશ્રી શ્રી મીત શાહે પ્રેઝન્ટેશનના માધ્યમથી રજૂ કરી હતી.
અમરેલી જિલ્લા સેવા સદન ખાતે યોજાયેલ આ બેઠકમાં, લાઠી બાબરા-પ્રાંત અધિકારીશ્રી બ્રહ્મભટ્ટ, બગસરા પ્રાંત અધિકારીશ્રી નંદા, ધારી પ્રાંત અધિકારીશ્રી, જિલ્લા શિક્ષણાધિકારીશ્રી ગોહિલ, રાજ્ય અને પંચાયત માર્ગ અને મકાન, પોલીસ, આરોગ્ય, નેશનલ હાઈ-વે ઓથોરિટી, સહિત વિવિધ કચેરીના અધિકારીશ્રીઓ અને કર્મચારીશ્રીઓ સહિતના ઉપસ્થિત રહ્યા હતા.
Recent Comments