સાવરકુંડલામાં દીકરીના જન્મદિવસે માનવતાની મહેક, મેહુલભાઈ વ્યાસે ૬૫૫ મું ચક્ષુદાન સ્વીકારી સ્થાપ્યો નવો કીર્તિમાન

​સેવા અને સમર્પણની ભૂમિ ગણાતા સાવરકુંડલા શહેરમાં આજે માનવતાનું ઉત્તમ ઉદાહરણ પૂરું પાડતો કિસ્સો સામે આવ્યો છે. રેડક્રોસ સોસાયટી સાવરકુંડલાના સેક્રેટરી અને સેવાભાવી અગ્રણી મેહુલભાઈ વ્યાસ તેમજ તેમના ધર્મપત્ની પૂજાબેન વ્યાસે પોતાની દીકરી ક્રિષ્ના વ્યાસના  જન્મદિવસની ઉજવણી કોઈ ભપકા વગર, એક પરોપકારી કાર્ય કરીને કરી છે.

​જન્મદિવસે મરણોત્તર ચક્ષુદાનનો સ્વીકાર કર્યો. 

આજરોજ મેહુલભાઈની દીકરી ક્રિષ્ના વ્યાસનો જન્મદિવસ હતો, ત્યારે જ સાવરકુંડલાના રહેવાસી લાભુબેન વિરાજભાઈ શેલારનું દુઃખદ નિધન થયું હતું. શોકની આ ઘડીમાં પણ માનવતાનો દીવો પ્રજ્વલિત રાખવા માટે મેહુલભાઈ અને તેમના પરિવારે દીકરીના જન્મદિવસની ખુશીને સેવામાં પરિવર્તિત કરી હતી. તેઓએ નિધન પામનાર લાભુબેનના ચક્ષુઓ સ્વીકારીને અંધકારમય જીવન જીવતા લોકો માટે પ્રકાશનું કિરણ બનવાનું નક્કી કર્યું હતું.

ચક્ષુદાન પ્રવૃત્તિ સાથે વર્ષોથી ગાઢ રીતે સંકળાયેલા મેહુલભાઈ વ્યાસે આજે આ ૬૫૫ મું ચક્ષુદાન સ્વીકારીને સેવાનો એક નવો રેકોર્ડ સ્થાપિત કર્યો છે. વ્યક્તિગત પ્રસંગોને સમાજ સેવા સાથે જોડવાની તેમની આ રીત ખરેખર પ્રેરણાદાયી છે.

​શહેરભરમાં પ્રશંસાની સરવાણી

દીકરીના જન્મદિવસે મોજ-મજા કરવાને બદલે કોઈની જિંદગીમાં રોશની લાવવાના આ ઉમદા કાર્યની સાવરકુંડલા શહેર અને પંથકમાં ભારે પ્રશંસા થઈ રહી છે. સોશિયલ મીડિયા અને સામાજિક વર્તુળોમાં લોકો મેહુલભાઈ અને તેમના પરિવારની આ ખાનદાનીને બિરદાવી રહ્યા છે.ચક્ષુદાન સ્વીકારવાની આ પ્રક્રિયામાં મેહુલભાઈ વ્યાસ સાથે મોહસીન બેલીમ પણ જોડાયા હતાં