અમરેલીમાં તમાકુના વેચાણની જોગવાઈઓનો ભંગ કરનાર સામે તંત્રની કાર્યવાહી

રાષ્ટ્રીય તમાકુ નિયંત્રણ કાર્યક્રમ અંતર્ગત ડિસ્ટ્રીક્ટ એન્ફોર્સમેન્ટ સ્કોવ્ડ દ્વારા અમરેલી શહેરમાં તમાકુ નિયંત્રણ અધિનિયમ – ૨૦૦૩ કાયદાની અમલવારી અને જન જાગૃતિ માટે દંડ અને વસુલાતની કામગીરી કરવામાં આવી હતી.

અમરેલી શહેરમાં નુતન સ્કુલ, નાગનાથ બસ સ્ટેન્ડ, મોટા બસ સ્ટેન્ડ, લીલીયા રોડ, ત્રિમંદિર, માર્કેટીંગ યાર્ડ, કેરીયા રોડ, બાયપાસ વિસ્તારમાં તમાકુ નિયંત્રણ અધિનિયમ – ૨૦૦૩ ની વિવિધ કલમો હેઠળ કુલ ૧૫ કેસ કરી રૂ.૨૫૫૦/- નો દંડ કરવામાં આવ્યો હતો.

જિલ્લા તમાકુ નિયંત્રણ સેલ – આરોગ્ય શાખા, પોલીસ વિભાગ, પ્રાથમિક તેમજ માધ્યમિક શિક્ષણ વિભાગ, એસ.ટી. વિભાગ અને ખોરાક અને ઔષધ નિયમન તંત્રની સંયુક્ત ટીમ દ્વારા તમાકુનું વેચાણ કરતા લારી ગલ્લા ઉપર ૧૮ વર્ષથી નાની ઉંમરનાંને તમાકુનું વેંચાણ કરવું દંડનીય અપરાધ છે. તેવું સૂચક બોર્ડ મુકેલ ન હોય, શૈક્ષણિક સંસ્થાઓની ૧૦૦ વારની ત્રિજ્યામાં તમાકુની બનાવટોનું વેચાણ કરનાર, જાહેર સ્થળોએ તમાકુની બનાવટોનું સેવન કરનાર, ઈ-સિગારેટનું વેચાણ-સંગ્રહ-ઉપયોગ કરનાર, તમાકુની બનાવટોની પ્રત્યક્ષ કે પરોક્ષ જાહેરાત આપનાર, નિર્દિષ્ટ આરોગ્ય વિષેયક ચિત્રાત્મક ચેતવણી વિના તમાકુની બનાવટોનું વેચાણ વગેરે અન્વયે આકસ્મિક તપાસ હાથ ધરી હતી.

જિલ્લા કલેક્ટરશ્રી, જિલ્લા વિકાસ અધિકારીશ્રી સૂચનાથી તેમજ સી.ડી.એચ.ઓ.શ્રી તથા ઈ.એમ.ઓ.શ્રીનાં માર્ગદર્શન હેઠળ તા.૨૬/૦૯/૨૦૨૫નાં રોજ જરૂરી કાર્યવાહી કરવામાં આવી હતી, તેમ મુખ્ય જિલ્લા આરોગ્ય અધિકારીશ્રીની યાદીમાં જણાવ્યું છે.