અમરેલીમાં પી.સી.પી.એન.ડી.ટી એક્ટ વિશે જાગૃતિકરણ, બેટી બચાવો બેટી પઢાવો, સંદેશ પ્રસરાવાયો

અમરેલીમાં નર્સિંગ કોલેજ ખાતે પી.સી.પી.એન.ડી.ટી અંગે જનજાગૃતિ વ્યાપક બનાવવા અને બેટી બચાવો, બેટી પઢાઓના સંદેશને પ્રસરવવા સેમિનાર યોજાયો હતો.

અમરેલી જિલ્લા મહિલા અને બાળ અધિકારીની કચેરી દ્વારા તાલુકા પંચાયતના પ્રમુખ શ્રી કિશોરભાઈ કાનપરીયાના અધ્યક્ષ સ્થાને આયોજિત આ સેમિનારમાં જિલ્લા મહિલા અને બાળ અધિકારી શ્રી શૈલેષભાઈ કણજારીયા દ્વારા બેટી બચાવો બેટી પઢાવો યોજના અંગે વિસ્તૃત જાણકારી આપવામાં આવી હતી. જ્યારે મુખ્ય જિલ્લા આરોગ્ય અધિકારી શ્રી આર.એમ.જોશીએ પીસીપીએનડીટી એક્ટની કાયદાકીય જોગવાઈઓ વિશે માર્ગદર્શન આપ્યું હતું.

એસ.એફ.એલ.મિનાક્ષીબેન મકવાણા દ્વારા મહિલા અને બાળ વિકાસ વિભાગની વિવિધ યોજનાઓ, ભારવીબેન દ્વારા સખી વન સ્ટોપ સેન્ટર અને રોશનીબેન મચ્છર દ્વારા મહિલા સહાયતા કેન્દ્રની કામગીરી અંગે જાણકારી આપી હતી. આ પ્રસંગે તાલુકા પંચાયત પ્રમુખ શ્રી કિશોરભાઈ કાનપરીયા દ્વારા પ્રેરણાદાયી સંબોધન કર્યું હતું.

આ તકે અમરેલી તાલુકા પંચાયતના કારોબારી ચેરમેન શ્રી નિકુલભાઇ, સામાજિક ન્યાય સમિતિના ચેરમેન શ્રી પ્રવીણભાઈ ચાવડા, નર્સિંગ કોલેજના પ્રિન્સિપાલ શ્રી મોસીન સહિત જુદા જુદા વિભાગના અધિકારી- કર્મચારી અને નર્સિંગ કોલેજના વિદ્યાર્થીનીઓ અને પ્રાધ્યાપકો ઉપસ્થિત રહ્યા હતા. અંતમાં શ્રી કચેરી અધિક્ષકશ્રીએ આભારવિધિ કરી હતી.