કોંગ્રેસ સ્થાપના દિવસ નિમિત્તે શહેરના દરેક વોર્ડમાં ઉજવણી કાર્યક્રમો યોજાયા

ભારતીય રાષ્ટ્રીય કોંગ્રેસના સ્થાપના દિવસ નિમિત્તે ભાવનગર શહેર કોંગ્રેસ દ્વારા શહેરના તમામ વોર્ડોમાં ઉજવણી કાર્યક્રમોનું આયોજન કરવામાં આવ્યું હતું. આ કાર્યક્રમો દરમિયાન કોંગ્રેસ પક્ષના ધ્વજવંદન, મીઠાઈ વહેંચણી તથા કાર્યકરો સાથે વિચારવિમર્શ કરવામાં આવ્યો હતો.

આ પ્રસંગે કોંગ્રેસના આગેવાનો અને કાર્યકરોએ પાર્ટીના સ્થાપનાથી આજ સુધીના ઐતિહાસિક યોગદાન, સ્વતંત્રતા આંદોલનમાં કોંગ્રેસની ભૂમિકા તેમજ સંવિધાનિક મૂલ્યોની રક્ષા માટે પાર્ટી દ્વારા આપવામાં આવેલા સંઘર્ષને યાદ કર્યો હતો. સાથે જ, દેશ અને રાજ્યમાં વર્તમાન મુદ્દાઓ અંગે ચર્ચા કરીને જનહિતના પ્રશ્નો માટે સંગઠિત રીતે લડત આપવાનો સંકલ્પ લેવાયો હતો.

શહેરના દરેક વોર્ડમાં યોજાયેલ આ કાર્યક્રમોમાં સ્થાનિક આગેવાનો, મોરચા-સેલના પ્રતિનિધિઓ, કાર્યકરો અને સમર્થકો મોટી સંખ્યામાં ઉપસ્થિત રહ્યા હતા. કાર્યક્રમ અંતે કોંગ્રેસ સ્થાપના દિવસની શુભેચ્છાઓ પાઠવી સંગઠનને વધુ મજબૂત બનાવવાની અપીલ કરવામાં આવી હતી.