Nutan: 14 વર્ષની ઉંમરે નૂતનને મુગલ-એ-આઝમમાં અનારકલીના રોલની ઓફર કરવામાં આવી, અભિનેત્રીએ ફિલ્મ નકારી કાઢી હતી!

ક્યારેક સુજાતા, ક્યારેક બંદિની અને ક્યારેક આંગન કી તુલસી તરીકે અભિનયની ઊંડી છાપ છોડનાર નૂતનની આજે 86મી જન્મજયંતિ છે. નૂતનને તેના સમયની સૌથી સુંદર અભિનેત્રી માનવામાં આવતી હતી, પરંતુ તેનું બાળપણ ટોણા સાંભળવામાં વીત્યું હતું. લોકોના ટોણાની એવી અસર થઈ કે નૂતન પોતાને દુનિયાની સૌથી કદરૂપી છોકરી માનવા લાગી. માતા શોભના અભિનેત્રી હતી અને પિતા કુમારસેન ફિલ્મ નિર્માતા હતા, તેથી 8 વર્ષની ઉંમરે તેમને નલ દમયંતી ફિલ્મમાં કામ કરવાની તક મળી.

14 વર્ષની ઉંમરે નૂતનને ફિલ્મ મુગલે-એ-આઝમમાં અનારકલીની ભૂમિકાની ઓફર કરવામાં આવી હતી પરંતુ તેણે તેને ઠુકરાવી દીધી હતી. માતાએ નૂતનને હમારી બેટીથી ફિલ્મોમાં લોન્ચ કરી હતી. અભિનય જોઈને ટોણા મારતા સ્વજનો પણ ફોન કરીને તેના વખાણ કરવા લાગ્યા. નૂતન ફિલ્મો પ્રત્યે એટલી ઝનૂની થઈ ગઈ કે તેણે પોતાની જાત પર ધ્યાન આપવાનું બંધ કરી દીધું.

નૂતનનું વજન એટલું ઘટી ગયું કે તેની માતાને ચિંતા થવા લાગી. શોભનાએ તેને ફિલ્મોથી દૂર કરવા માટે સ્વિટ્ઝરલેન્ડ મોકલી. નૂતને એક વર્ષમાં 22 કિલો વજન વધાર્યું. ભારત પરત આવ્યા બાદ નૂતને 1952માં મિસ ઈન્ડિયામાં ભાગ લીધો હતો. અને અહીંથી તેની કારકિર્દીની બીજી ઇનિંગ શરૂ થઈ. નૂતન સીમા, પેઇંગ ગેસ્ટ, અનારી, સુજાતા, છલિયા, દેવી, સરસ્વતીચંદ અને મેં તુલસી તેરે આંગન કીમાં કામ કરીને પોતાને ટોચની અભિનેત્રીઓમાં સ્થાન પામી હતી.

રાજેન્દ્ર કુમાર, સંજીવ કુમાર અને શમ્મી કપૂર નૂતનના દિવાના હતા, પરંતુ તેણે 1959માં નેવી લેફ્ટનન્ટ કમાન્ડર રજનીશ સાથે લગ્ન કર્યા. બે વર્ષ પછી નૂતને પુત્ર મોહનીશને જન્મ આપ્યો. લગ્ન પછી પણ નૂતન ફિલ્મોમાં દેખાતી રહી. નૂતનને 1990 માં સ્તન કેન્સર હોવાનું નિદાન થયું હતું અને તે પછીના વર્ષે 21 ફેબ્રુઆરીએ બ્રીચ કેન્ડી હોસ્પિટલમાં સારવાર દરમિયાન મૃત્યુ પામ્યા હતા. નૂતનને અભિનય કારકિર્દીમાં 8 શ્રેષ્ઠ અભિનેત્રી અને 1975માં પદ્મશ્રીનો એવોર્ડ મળ્યો હતો