સુરતમાં સોનાનાં નકલી ઘરેણાં પર હોલમાર્ક કરીને વેચતી ટોળકીને પોલીસે ઝડપી પાડી

સુરત પોલીસને મોટી સફળતા મળી છે જેમાં, સરથાણા વિસ્તારમાં નકલી સોનાના દાગીના બનાવતી ગેંગ ઝડપાઈ છે. જે અસલી સોનાના હોલમાર્કા સાથે ભેળસેળયુક્ત નકલી સોનાના દાગીના વેચતા હતા. આ મામલે પોલીસે 12 શખસોની ધરપકડ કરી છે. પોલીસે ચેન, હોલમાર્કનો સિક્કો, ચેન બનાવવાનું મશીન સહિતનો મુદ્દામાલ જપ્ત કર્યો છે. સોનાનાં આકર્ષણ સામે લોકો આંધળા બનીને ઘરેણાંની ખરીદી કરતા હતા. જોકે, લોકલ ક્રાઈમ બ્રાન્ચે ફરિયાદનાં આધારે ગેંગની ધરપકડ કરી છે.

સુરતના સરથાણા વિસ્તારમાંથી હોલમાર્ક ખરા પરંતુ તેમા ભેળસેળયુક્ત નકલી સોનાના દાગીના બનાવતુ કારખાનું ઝડપાયું છે. આ કારખાનામાં ઉત્પાદિત થતા દાગીના ઉપર 100% શુદ્ધનો સિક્કો મારીને તેમાં માત્ર 23 % ગોલ્ડ નાખી હોલમાર્કનો સિક્કો લગાવીને વેચાણ કરતા હતા. આ અંગે પર્દાફાશ ત્યારે થયો જ્યારે મુખ્ય આરોપી વિવેક સોની સહિતના આરોપીઓ યોગી ચોક ખાતે આવેલા જ્વેલરી સ્ટોરમાં નકલી સોનાની ચેઈન વેચવા ગયા હતા. જ્વેલર્સના માલિકને સોનું નકલી જણાતા તેણે પોલીસને જાણ કરી હતી.

આ ઘટના મામલે પોલીસ વિભાગે અલગ અલગ ટીમ બનાવીને આરોપીઓ સુધી પહોંચવા તપાસ હાથ ધરી હતી. ત્યારબાદ ઉત્રાણ પોલીસ મથકની હદમાં આવેલ વેલંજા ખાતે રુદ્રાક્ષ સોસાયટીમાં પોલીસે દરોડા પાડ્યા હતા. જ્યા ઘરમાં જ અસલી સોનાના નામે ભેળસેળયુક્ત નકલી સોનાના દાગીના બનાવતા હતા. પોલીસે સ્થળ પરથી ચાર ચેઈન, ચેઈન બનાવવાનું મશીન, અને હોલમાર્કના સિક્કા સહિતની સામગ્રી જપ્ત કરીને કુલ 12 આરોપીઓની ધરપકડ છે. 

આ સમગ્ર મામલે પોલીસની તપાસમાં સામે આવ્યું છે કે, મુખ્ય આરોપી વિવેક સોની સહિત 12 લોકો સાથે મળી ભેળસેળયુક્ત સોનુ બનાવતા હતા. એક મહિનાથી આ કારખાનું ચલાવવામાં આવતું હતું. આ મામલે વધુ તપાસ ચાલી રહી છે.