પોપ ફ્રાન્સિસે કેરળના જ્યોર્જ જેકબ કુવાકડને કાર્ડિનલ બનાવ્યા : પીએમ મોદીએ કહ્યું, “ભારત માટે આ ગર્વની વાત છે”

વડાપ્રધાન નરેન્દ્ર મોદીએ કેરળના આર્કબિશપ જ્યોર્જ જેકબ કુવાકડને કાર્ડિનલ બનવા બદલ અભિનંદન પાઠવ્યા છે. તેમણે કહ્યું કે ભારત માટે આ ખૂબ જ ગર્વની વાત છે કે આર્કબિશપ જ્યોર્જ કુવાકડને પોપ ફ્રાન્સિસ દ્વારા કાર્ડિનલ નિયુક્ત કરવામાં આવ્યા છે. પીએમ મોદીએ ટ્‌વીટ કરીને કહ્યું કે, હું ખૂબ જ ખુશ છું કે પોપ ફ્રાન્સિસે જ્યોર્જ જેકબ કુવાકડને પવિત્ર રોમન કેથોલિક ચર્ચના કાર્ડિનલ બનાવ્યા છે. જ્યોર્જ કાર્ડિનલ કુવાકોડે ભગવાન ઇસુ ખ્રિસ્તના પ્રખર અનુયાયી તરીકે માનવતાની સેવામાં પોતાનું જીવન સમર્પિત કર્યું છે.

તેના ભવિષ્યના પ્રયાસો માટે મારી શુભેચ્છાઓ. વેટિકન ખાતે આયોજિત આ સમારોહના સાક્ષી બનવા માટે ભારત સરકારે કેન્દ્રીય મંત્રી જ્યોર્જ કુરિયનના નેતૃત્વમાં એક પ્રતિનિધિમંડળ પણ મોકલ્યું હતું. ભારતીય પાદરી જ્યોર્જ જેકબ કુવાકડની નિમણૂક કેન્દ્રીય મંત્રી જ્યોર્જ કુરિયનની હાજરીમાં થઈ હતી. આ પ્રતિનિધિમંડળ પોપ ફ્રાન્સિસને પણ મળ્યું હતું. જ્યોર્જ કુવાકેડની નિમણૂક સાથે, ભારતમાં કાર્ડિનલ્સની કુલ સંખ્યા હવે છ પર પહોંચી ગઈ છે. આનાથી વેટિકનમાં ભારતનું પ્રતિનિધિત્વ વધુ મજબૂત બન્યું છે. ૫૧ વર્ષના કુવાકડ મૂળ કેરળના છે. પોપ ફ્રાન્સિસ આવતા વર્ષે ભારતની મુલાકાત લઈ શકે છે. કેન્દ્રીય મંત્રી જ્યોર્જ કુરિયને શનિવારે આ માહિતી આપી હતી. જાે કે હજુ સુધી તારીખો જાહેર કરવામાં આવી નથી. પીએમ મોદી પહેલા જ પોપને ભારત આવવાનું આમંત્રણ આપી ચૂક્યા છે. તારીખો ટૂંક સમયમાં જાહેર કરવામાં આવશે. હકીકતમાં, કેથોલિક ચર્ચે વર્ષ ૨૦૨૫ને જ્યુબિલી વર્ષ તરીકે જાહેર કર્યું છે. આ સંદર્ભે તેમના ભારત આવવાની શક્યતા છે. પીએમ મોદીએ પોપ ફ્રાન્સિસને જી-૭ સમિટ દરમિયાન ભારત આવવાનું આમંત્રણ આપ્યું હતું.