રાજુલા શહેરમાં વેપારીના ટેબલના ખાનામાંથી રોકડા ૪૦ હજારની ચોરી

રાજુલામાં એક વેપારીના ટેબલના ખાનામાંથી રોકડા રૂ.૪૦ હજારની ચોરી કરવામાં આવી હતી. ઉપરાંત તમાકુના પાઉચ અને ડબલા વેરવિખેર કરી નાખવામાં આવ્યા હતા. છગનભાઇ વાલાભાઇ બલદાણીયા (ઉ.વ.૫૨)ની છતડીયા રોડ ગોરડીયા કોમ્પ્લેક્સમાં આવેલ દુકાનમાં બે અજાણ્યા ચોર ઇસમોએ રાત્રીના સમયે ગેરકાયદેસર પ્રવેશ કર્યો હતો. ચોરોએ દુકાનમાં રહેલ સોપારી, સિગારેટ તથા તમાકુના પાઉચ અને ડબલાઓ વેરવિખેર કરી નાખ્યા હતા, જે દર્શાવે છે કે તેઓએ સામાનની પણ ઉથલપાથલ કરી હતી. ચોર ઇસમોએ દુકાનના ટેબલના ખાનામાં રાખેલા એક થેલામાંથી રોકડ રકમ રૂ.૪૦,૦૦૦ની ચોરી કરી હતી.પોલીસે અજાણ્યા ચોર ઇસમો વિરુદ્ધ ગુનો નોંધીને વધુ તપાસ હાથ ધરી હતી. રાજુલા પોલીસ સ્ટેશનના હેડ કોન્સ્ટેબલ એસ.એસ. બાંભણીયા વધુ તપાસ કરી રહ્યા છે.