શ્રી બ્રહ્મસેના, સાવરકુંડલા દ્વારા ‘શ્રી શક્તિ નવરાત્રિ મહોત્સવ’નું ભવ્ય આયોજન … નવરાત્રી પર્વ શક્તિની આરાધના અને સેવાકાર્યો નો સંગમ

બ્રહ્મસેના, સાવરકુંડલા દ્વારા આયોજિત ‘શ્રી શક્તિ નવરાત્રી મહોત્સવ’ ભક્તિ અને સેવાના અનોખા સંગમ તરીકે ઉભરી આવ્યો છે. છેલ્લા ૧૫ વર્ષથી સતત યોજાઈ રહેલો આ મહોત્સવ આ વર્ષે પણ માતાજીના ભક્તો માટે આસ્થા અને ઉલ્લાસનું કેન્દ્ર બન્યો છે. આ પવિત્ર પર્વમાં બ્રહ્મબંધુઓ મોટી સંખ્યામાં ઉપસ્થિત રહીને માતા આદ્યશક્તિની આરાધના કરી રહ્યા છે. આ સમગ્ર આયોજનમાં બ્રહ્મસેનાનાં પૂર્વ હોદ્દેદારો સહિત તમામ બ્રહ્મબંધુઓ ખભેખભા મિલાવીને કાર્ય કરી રહ્યા છે. આ મહોત્સવ સંપૂર્ણપણે બ્રહ્મ સમાજ ના દાતાઓ દ્વારા આપવામાં આવતા અનુદાનથી જ યોજાય છે. સાવરકુંડલા શહેર અને આસપાસના ગ્રામ્ય વિસ્તારમાં વસતા ભૂદેવો આ શક્તિ નવરાત્રિ મહોત્સવમાં ઉમંગભેર ભાગ લઈને તેની શોભા વધારી રહ્યા છે.
મહોત્સવ દરમિયાન દરરોજ સાંજે ભૂદેવો દ્વારા વિશેષ પૂજા અને મહાઆરતી નું આયોજન કરવામાં આવે છે, જેમાં શ્રદ્ધાળુઓ ખૂબ ઉત્સાહથી ભાગ લે છે. ત્યારબાદ, સંગીતના સથવારે માતાજીના રાસ-ગરબાનું આયોજન થાય છે, જ્યાં સૌ કોઈ ભક્તિભાવથી ગરબે ઘૂમીને માતાજીના ગુણગાન ગાય છે. આ કાર્યક્રમમાં દાતાઓ, આગેવાનો અને સમગ્ર બ્રહ્મ સમાજના સભ્યો મોટી સંખ્યામાં ઉપસ્થિત રહીને આ ભક્તિમય વાતાવરણનો હિસ્સો બની રહ્યા છે. આ મહોત્સવ માત્ર ધાર્મિક ઉજવણી પૂરતો સીમિત નથી. બ્રહ્મસેના સમાજસેવાના અનેક કાર્યો માટે પ્રેરણાનું સ્ત્રોત બન્યું છે. સંસ્થા દ્વારા વર્ષ દરમિયાન શિક્ષણ, આરોગ્ય અને અન્ય સમાજલક્ષી પ્રવૃત્તિઓ હાથ ધરવામાં આવે છે. આ ઉત્સવ માંથી મળતા સહયોગ અને પ્રોત્સાહનથી આ તમામ સેવાકાર્યોને વેગ મળે છે. આ પ્રયાસોમાં યુવાનો અને વડીલો બંને ખભેખભા મિલાવીને કાર્ય કરી રહ્યા છે, જે સંગઠનશક્તિનું ઉત્કૃષ્ટ ઉદાહરણ પૂરું પાડે છે. આ ભવ્ય આયોજનને સફળ બનાવવા માટે શ્રી બ્રહ્મસેનાની સમગ્ર ટીમ ખરેખર અભિનંદનને પાત્ર છે. આ મહોત્સવની સફળતાનો શ્રેય સંસ્થાના પ્રમુખ કિરીટભાઈ મહેતા, માર્ગદર્શક ચિરાગભાઈ આચાર્ય, પ્રોજેક્ટ કન્વીનર તુષારભાઈ, ઉપપ્રમુખ પુનીતભાઈ જોષી, મંત્રી મનીષભાઈ દવે અને સમગ્ર ટીમની અથાગ મહેનતને જાય છે. વડીલો અને સમાજના આગેવાનો દ્વારા તેમના આ ભગીરથ કાર્ય બદલ અભિનંદન અને શુભકામનાઓ પાઠવવામાં આવી રહી છે. શક્તિની આરાધના, ભક્તિભાવ અને સમાજસેવાના અનોખા સંગમ દ્વારા બ્રહ્મસેના એ સમાજમાં સકારાત્મક ઉર્જાનો સંચાર કર્યો છે. આ મહોત્સવ એ માત્ર એક ધાર્મિક પર્વ જ નહીં, પરંતુ એક સામાજિક ઉત્સવ પણ છે, જે સૌને એકતા અને પરસ્પર સહયોગ ના બંધનમાં બાંધે છે. સમગ્ર કાર્યક્રમનું આયોજન ધાર્મિક વૈદિક પૂજા-અર્ચના સાથે ખૂબ જ સુવ્યવસ્થિત રીતે કરવામાં આવ્યું છે. તેમ પત્રકાર યશપાલ વ્યાસની યાદીમાં જણાવેલ છે.