અરવલ્લીજિલ્લામાં મધ્યાન ભોજન યોજનામાં વ્યાપક ભ્રષ્ટાચાર, બાળકોને મેનુ મુજબ ભોજન આપવામાં નથી આવતું અને બાળકોકુપોષિત : અમિત ચાવડા

આજરોજ જન આક્રોશ યાત્રાના સાતમા દિવસની શરૂઆત મોડાસા શહેરની સહયોગ ચોકડીથી કરવામાં આવી. ત્યારબાદ યાત્રા રામપાર્ક, ચાકરિયા–ઝાલોદ માર્ગ, માલપુર, ઉભરણ, અણ્યોર ચોકડી, બગત, સાઠંબા, બાયડ, તેનપુર અને દહેગામ માર્ગે મોટા ચિલોડા તરફ આગળ વધી. માર્ગમાં સ્થાનિક નાગરિકો, મહિલાઓ, યુવાનો અને ખેડૂતો દ્વારા યાત્રાનું ઉમળકાભેર સ્વાગત કરવામાં આવ્યું.

ગુજરાત પ્રદેશ કોંગ્રેસ પ્રમુખ શ્રી અમિતભાઈ ચાવડાએ જણાવ્યું કે આ વિસ્તાર વર્ષોથી સરકારની બેદરકારીનો ભોગ બની રહ્યો છે. રસ્તાઓ તૂટી ગયેલા છે, પીવાના પાણીની ગંભીર સમસ્યા છે, જ્યારે ગટર અને ડ્રેનેજની કામગીરી વર્ષોથી અધૂરી છે. ખેડૂતોને સિંચાઈ માટે પૂરતું પાણી મળતું નથી, વીજ પુરવઠો અસ્થિર છે અને ગ્રાઉન્ડ વોટર લેવલ ઘટતા ખેતી મુશ્કેલ બની ગઈ છે.

સરકારની નિષ્ફળતાનો સૌથી મોટો ઝટકો આજે ખેડૂત વર્ગને ખાતરની તંગી અને કાળાબજારીના રૂપમાં લાગી રહ્યો છે. ખાતર ગોડાઉનમાં જથ્થાબંધ રાખીને બહારના રાજ્યોમાં વેચાય છે, જ્યારે અરવલ્લીના ખેડૂતને પોતાના ખેતર માટે ખાતર સુધી મળતું નથી. ખેડૂતને લૂંટવાના આ ગંદા કારોબારમાં ભાજપના મંત્રીઓ અને તેમના મળતીયાઓ જ સંડોવાયેલા છે.

વધુમાં સરકારી ભરતી પરીક્ષાઓમાં પેપરો વારંવાર ફૂટે છે, જેના કારણે યુવાઓને નોકરી મળતી નથી. મળે તો ફિક્સપે અને આઉટસોર્સિંગના નામે ખુલ્લેઆમ શોષણ થાય છે. આદિવાસી સમાજના યુવાનોને સ્કોલરશીપ મળતી નથી, જાતિના દાખલા માટે દરદર ભટકવું પડે છે. રોજગારી માટે કોઈ વ્યવસ્થા નથી અને સ્થાનિક રોજગાર મળે તે માટે કોઈ GIDC પણ નથી.

માત્ર 7 દિવસની જન આક્રોશ યાત્રાએ જ સરકારની ઊંઘ હરામ કરી દીધી છે. યાત્રા આગળ વધતી જાય તેટલું સરકાર અને તેમના મળતીયા બુટલેગરો ભૂગર્ભમાં ઉતરતા જાય છે, કારણ કે હવે જનતા સીધી રસ્તા પર આવી ગઈ છે. યાત્રામાં ફિક્સપે–આઉટસોર્સિંગ નાબૂદ કરવાની માગ ઉઠતાં સરકારે લોલીપોપરૂપ રાહતની જાહેરાત કરી છે, પરંતુ કોંગ્રેસની સરકાર આવશે તો ફિક્સપે–કોન્ટ્રાક્ટ અને આઉટસોર્સિંગની આ દુષ્પ્રથા સંપૂર્ણપણે સમાપ્ત કરવામાં આવશે જનતામાં ભારે આક્રોશ છે સરકાર નહિ સુધરે તો ગાંધીનગરમાં બેઠેલા હપ્તાખોરોને લોકો પકડીને ઘર ભેગા કરશે.

આ પ્રસંગે AICC સેક્રેટરી અને પૂર્વ ધારાસભ્ય શ્રી ઋત્વિકભાઈ મકવાણા, દાંતાના ધારાસભ્ય શ્રી કાંતિભાઈ ખરાડી, પૂર્વ ધારાસભ્ય શ્રી રાજેન્દ્રસિંહ ઠાકોર, પૂર્વ ધારાસભ્ય શ્રી જશુભાઈ પટેલ, ST વિભાગના ચેરમેન શ્રી રાજુભાઈ પારધી સહિત વરિષ્ઠ આગેવાનો અને સ્થાનિકો મોટી સંખ્યામાં ઉપસ્થિત રહ્યા