અમરેલી કલેક્ટર કચેરીના સભાખંડ ખાતે જિલ્લા કલેક્ટર શ્રી ગૌરાંગ મકવાણાની અધ્યક્ષતામાં જિલ્લા સંકલન અને ફરિયાદ સમિતિની બેઠક યોજાઈ હતી.બેઠકમાં જિલ્લાના લોકપ્રતિનિધિશ્રીઓ દ્વારા તાલુકાના વિવિધ ગામોના વિકાસલક્ષી કામોની સંકલન તથા ફરિયાદ સમિતિના પ્રશ્નોને જિલ્લા કલેકટરશ્રી સમક્ષ રજુ કરાવામાં આવ્યા હતા.
બેઠકની શરૂઆતમાં કલેક્ટરશ્રીએ નવા વર્ષની શુભેચ્છાઓ પાઠવી હતી. તેઓએ લોકપ્રતિનિધિશ્રીઓ દ્વારા રજૂ કરવામાં આવેલા પ્રશ્નોને ગંભીરતાથી લઈ તાત્કાલિક અને કાયમી ધોરણે નિરાકરણ લાવવા અમલીકરણ અધિકારીઓને તાકીદ કરી એક થી વધુ વિભાગો સાથે સંકળાયેલ પ્રશ્નો બાબતે પરસ્પર સંકલન અને વ્યવહારુ અભિગમ અપનાવી લોકોના પ્રશ્નો ઉકેલવા કેટલાક રચનાત્મક સૂચનો કર્યા હતા. તેઓએ ખાસ કરીને શહેરી વિસ્તારોમાં સ્વચ્છતા જળવાઈ રહે તે જોવા પણ સબંધિત અધિકારીશ્રીઓને સૂચના આપી હતી.
વધુમાં કલેક્ટરશ્રીએ સંકલનની બેઠકમાં ચર્ચાયેલ લોકપ્રતિનિધિશ્રીઓના પ્રશ્નોનું ફોલોઅપ નિયમિતપણે લેવા અમલીકરણ અધિકારીઓને સૂચના આપવામાં આવી હતી. તેમજ બાકી વિકાસકાર્યો ગુણવત્તાયુક્ત અને સમયમર્યાદામાં પૂર્ણ કરી તાત્કાલિક ડેટા એન્ટ્રી કરવા જણાવ્યું હતું.
બેઠકમાં સાંસદ શ્રી નારણભાઈ કાછડીયા, ધારાસભ્ય શ્રી વિરજીભાઈ ઠુંમ્મર, ધારાસભ્યશ્રી પ્રતાપભાઈ દુધાત, જિલ્લા વિકાસ અધિકારી શ્રી દિનેશ ગુરવ, નાયબ વન સંરક્ષક સુશ્રી પ્રિયંકા ગેહલોત, ડીઆરડીએ નિયામક શ્રી વિશાલ સક્સેના, નાયબ કલેકટર શ્રી સી. કે. ઉંધાડ, નાયબ કલેક્ટર શ્રી કે. એસ. ડાભી તેમજ પોલીસ, માર્ગ અને મકાન, પંચાયત અને આરોગ્ય જેવા વિવિધ ખાતાઓના અધિકારીશ્રીઓ તથા સંકલન અમલીકરણ અધિકારીશ્રીઓ ઉપસ્થિત રહ્યા હતા.
Recent Comments