અમરેલી જિલ્લા કલેક્ટરશ્રી-વ-રોડ સેફ્ટિ કાઉન્સિલના ચેરમેનશ્રી અજય દહિયાના અધ્યક્ષ સ્થાને જિલ્લા માર્ગ સલામતી સમિતિની બેઠક યોજાઈ હતી. અમરેલી જિલ્લા સેવા સદન ખાતે યોજાયેલી બેઠકમાં જિલ્લા કલેક્ટરશ્રીએ ગત બેઠકની સમીક્ષા સાથે આગામી સમયના આયોજન અને રોડ સેફ્ટીને લગતા કાર્યોની સમીક્ષા કરી હતી.
અમરેલી જિલ્લા કલેક્ટરશ્રીએ, જિલ્લાના માર્ગોને વધુ સલામત બનાવવા અને માર્ગ સુરક્ષાના કાયદાના અમલીકરણ અંગે સમિતિને માર્ગદર્શન અને દિશાનિર્દેશનો આપ્યા હતા. નેશનલ હાઇવે-માર્ગ મકાન વિભાગ રાજ્ય અને પંચાયતને તેમજ નગરપાલિકા અમરેલી સહિતના સભ્યશ્રીઓને માર્ગ સલામતી માટેના કાર્ય સતત શરુ રાખવા માટે સૂચન કર્યુ હતુ.અમરેલી જિલ્લા કલેક્ટરશ્રી માર્ગ સુરક્ષા સલામતિ સમિતિના સભ્યોને તેમને સંબંધિત ક્ષેત્રોમાં માર્ગ સલામતી માટેની કાર્યવાહી કરવા માટે સૂચના આપી હતી. સમગ્ર જિલ્લામાં વરસાદ બાદ માર્ગોમાં સર્વે કરી જરુર જણાય ત્યાં રિસર્ફેસીંગની કામગીરી હાથ ધરવા માટે સૂચના આપી હતી. જિલ્લામાં નંબર પ્લેટ વગર પરિવહન કરતા ડમ્પરના ચાલકોને દંડ કરી અને નંબર પ્લેટ લગાડવા માટે ઝુંબેશ સ્વરુપે કામગીરી કરવા જણાવ્યુ હતુ.
તેમણે જિલ્લાની તમામ નગરપાલિકાઓના વિસ્તારમાં આવતા માર્ગોની નિયમિત રુપે સફાઈ થાય તે સુનિશ્ચિત કરવા અને તે અંગેની કાર્યવાહીનો સમિતિને રિપોર્ટ કરવા માટે સૂચના આપી હતી. જિલ્લાના જે માર્ગો પર પશુઓના કારણે ટ્રાફિકની સમસ્યા સર્જાય છે ત્યાં નગરપાલિકા અને ટ્રાફિક પોલીસને જરુરી માર્ગદર્શન આપ્યું હતું.બેઠકમાં, એ.આર.ટી.ઓ શ્રી પઢિયાર દ્વારા સમગ્રતયા અહેવાલ રજૂ કરવામાં આવ્યો હતો. આ ઉપરાંત જિલ્લામાં સંભવિત અકસ્માત ક્ષેત્રોમાં ક્રેશ બેરિયરની કામગીરી, સાઇનેઝ, અકસ્માતની સંભાવના વધુ રહેતી હોય તેવા માર્ગો પર સફેદ પટ્ટા લગાડવાની કામગીરીની સમીક્ષા કરવામાં આવી હતી.
જિલ્લા કલેક્ટરશ્રીએપ જિલ્લામાં રોડ સેફ્ટીને લગતા કાર્યોની અને ભવિષ્યના આયોજનની સમીક્ષા કરી જરુરી સૂચનો કર્યા હતા. અમરેલી નગરના શહેરી વિસ્તારમાંથી પસાર થતા મહત્ત્વના રોડ પર આવતી સોસાયટીના એપ્રોચ રોડ પર અંદરની તરફ સ્પીડ બ્રેકર મૂકવાનું સૂચન જિલ્લા કલેક્ટરશ્રીએ કર્યુ હતુ.આ બેઠકમાં અમરેલી એ.આર.ટી.ઓ શ્રી પઢિયાર, માર્ગ મકાન વિભાગ રાજ્ય અને પંચાયત, નેશનલ હાઇવે ઓથોરિટી, નગરપાલિકા અમરેલીના પ્રતિનિધિ સહિતના સભ્યશ્રીઓ ઉપસ્થિત રહ્યા હતા.
Recent Comments