ઉત્તરાખંડની નવી કેબિનેટની પ્રથમ બેઠકમાં ધામી સરકારનો મોટો નિર્ણય

ઉત્તરાખંડની નવી સરકારની પ્રથમ કેબિનેટ બેઠક યોજાઈ હતી. બેઠક બાદ મીડિયાને સંબોધતા સીએમ પુષ્કર સિંહ ધામીએ કહ્યું કે અમારી સરકાર ઉત્તરાખંડમાં યુનિફોર્મ સિવિલ કોડ લાગુ કરવા માટે પ્રતિબદ્ધ છે. આ ક્રમમાં, અમારી સરકાર એક સમિતિની રચના કરશે, જે રાજ્યમાં યુનિફોર્મ સિવિલ કોડ લઈને ડ્રાફ્ટ તૈયાર કરશે. ૨૪ માર્ચે મળેલી કેબિનેટની બેઠકમાં ર્નિણય લેવાયો હતો કે રાજ્ય સરકાર આ કાયદાના અમલ માટે નિષ્ણાતોની સમિતિની રચના કરશે. ધામીએ ફેસબુક પર પણ પોસ્ટ કરીને લખ્યું કે આજે પ્રથમ કેબિનેટ મીટિંગ દરમિયાન બીજેપીના પ્રદેશ અધ્યક્ષ મદન કૌશિક અને સંગઠન મહાસચિવ અજય કુમારે વિઝન લેટર સોંપ્યો.

ભાજપે ચૂંટણી સમયે રાજ્યની જનતા સમક્ષ જે વિઝન પેપર મૂક્યું હતું તેના પર વિશ્વાસ વ્યક્ત કરતાં આપ સૌએ અમને પ્રચંડ બહુમતી સાથે સરકાર બનાવવાની તક આપી. માનનીય વડાપ્રધાન નરેન્દ્ર મોદીના નેતૃત્વ હેઠળની અમારી સરકાર વિઝન પેપરમાં દર્શાવેલ તમામ સંકલ્પોને તૈયારી સાથે પૂર્ણ કરીને ઉત્તરાખંડને દેશનું શ્રેષ્ઠ રાજ્ય બનાવવા માટે કામ કરશે. વિધાનસભા ચૂંટણી પ્રચાર દરમિયાન પુષ્કર સિંહ ધામીએ ખાતિમામાં યુનિફોર્મ સિવિલ કોડ લાગુ કરવાની જાહેરાત કરી હતી. ત્યારે તેમણે કહ્યું હતું કે ઉત્તરાખંડમાં વહેલામાં વહેલી તકે યુનિફોર્મ સિવિલ કોડ લાગુ કરવામાં આવશે.

ધામીએ કહ્યું હતું કે ચૂંટણી પછી નવી સરકાર શપથ લેશે કે તરત જ ન્યાયશાસ્ત્રીઓની એક સમિતિની રચના કરવામાં આવશે જે સમગ્ર રાજ્યમાં યુનિફોર્મ સિવિલ કોડનો ડ્રાફ્ટ તૈયાર કરશે. ખાતિમામાં રેલી દરમિયાન સીએમ ધામીએ કહ્યું કે તેનાથી સામાજિક સમરસતા વધશે. આ ઉપરાંત, તે મહિલા સશક્તિકરણને મજબૂત કરશે અને રાજ્યની અસાધારણ સાંસ્કૃતિક-આધ્યાત્મિક ઓળખ અને પર્યાવરણને સુરક્ષિત કરવામાં પણ મદદ કરશે. તેમણે કહ્યું કે હું જે જાહેરાત કરવા જઈ રહ્યો છું તે મારી પાર્ટીનો સંકલ્પ છે અને ભાજપની નવી સરકાર બનતા જ તે પૂર્ણ થશે. આ સાથે ‘દેવભૂમિ’ની સંસ્કૃતિ અને વારસાને અકબંધ રાખવાની અમારી મુખ્ય ફરજ છે, આ માટે અમે સંપૂર્ણ પ્રતિબદ્ધ છીએ.