ઓસ્ટ્રેલિયાની સરકારે ચાલુ વર્ષ માટે પર્મેનન્ટ ઇમિગ્રેશન વીઝાની સંખ્યામાં ધરખમ વધારો કર્યો

ઓસ્ટ્રેલિયાની સરકારે ચાલુ નાણાકીય વર્ષ માટે પર્મેનન્ટ ઇમિગ્રેશન વીઝાની સંખ્યા ૩૫,૦૦૦ વધારી ૧૯૫,૦૦૦ કરવાની શુક્રવારે જાહેરાત કરી છે. દેશમાં કુશળ પ્રોફેશનલ અને શ્રમિકોની અછતને પગલે આ ર્નિણય કર્યો છે. સરકારે તેના ઇમિગ્રેશન પ્રોગ્રામમાં પણ સુધારો કરવાની પણ જાહેરાત કરી છે. કોરોના મહામારી બાદ શ્રમિકોની અછતની સમસ્યા વધુ ઘેરી બની છે. સરકારો, ટ્રેડ યુનિયન્સ, બિઝનેસ અને ઉદ્યોગના ૧૪૦ પ્રતિનિધિઓની બે દિવસની જાેબ્સ એન્ડ સ્કીલ સમીટ દરમિયાન ગૃહ બાબતોના પ્રધાન ક્લેર ઓનીલે ૩૦ જૂન ૨૦૨૩માં પૂરા થતાં વર્ષ માટે કાયમી ઇમિગ્રેશનની સંખ્યામાં વધારો કરવાની આ જાહેરાત કરી હતી. તેમણે જણાવ્યું હતું કે ઓસ્ટ્રેલિયાની નર્સો છેલ્લાં બે વર્ષથી સળંગ બે અને ત્રણ શિફ્ટમાં કામ કરે છે.

ગ્રાઉન્ડ સ્ટાફના અભાવે ફ્લાઇટ્‌સ કેન્સલ થાય છે અને વૃક્ષો પર ફળો સડી જાય છે, કારણ કે કોઇ તેને લેનાર નથી. સરકારનો ફોકસ નોકરીમાં ઓસ્ટ્રેલિયન નાગરિકને અગ્રતા આપવાનો છે, તેથી સમીટમાં તાલિમ તથા મહિલાઓ અને બીજા વંચિત ગ્રૂપોની ભાગીદારી પર ધ્યાન કેન્દ્રીત કરવામાં આવ્યું છે. તેમણે જણાવ્યું હતું કે કોરોના મહામારીને અસરની અસર એટલી તીવ્ર છે કે આપણે બીજા દરેક વિકલ્પોનો ઉપયોગ કરીએ તો પણ ઓછામાં ઓછા ટૂંકા ગાળા માટે હજુ ઘણા હજારો શ્રમિકોની અછત રહે છે. ઘણા શ્રેષ્ઠ અને તેજસ્વીઓ વ્યક્તિઓ ઓસ્ટ્રેલિયાની જગ્યાએ કેનેડા, જર્મની અને બ્રિટનમાં સ્થળાંતર કરવાનું પસંદ કરે છે

ઓસ્ટ્રેલિયાના ઇમિગ્રેશન પ્રોગ્રામને ખૂબ જ જટિલ ગણાવતા તેમણે જણાવ્યું હતું કે તેમાં ૭૦થી વધુ યુનિક વિઝા પ્રોગ્રામ છે. ઓસ્ટ્રેલિયા રાષ્ટ્રીય હિતમાં તેનો ઇમિગ્રેશન પ્રોગ્રામ ફરી તૈયાર કરવા માટે એક સમિતિની રચના કરશે. ઓસ્ટ્રેલિયાના વડાપ્રધાન એન્થની આલ્બેનીઝે ગુરુવારે આશરે ૧.૧ અબજ ઓસ્ટ્રેલિયન ડોલરના ખર્ચ સાથે આગામી વર્ષે ૧,૮૦,૦૦૦ સ્થળો વોકેશન એજ્યુકેશન સ્કૂલ માટે ઓફર કરવામાં આવશે. ઓસ્ટ્રેલિયાએ કોરોના મહામારીના પ્રારંભના ૨૦ મહિનામાં પ્રવાસીઓ પર આકરા નિયંત્રણો લાદ્યા હતા.