‘ગુજરાત મહિલા વિકાસ પુરસ્કાર’ માટે સ્વૈચ્છિક સંસ્થા અને સામાજિક કાર્યકરોએ તા.૩૦ નવેમ્બર સુધીમાં અરજી કરવી

રાજ્યમાં મહિલા વિકાસને લગતી શ્રેષ્ઠ કામગીરી કરતી એક સ્વૈચ્છિક સંસ્થાને અને એક શ્રેષ્ઠ સામાજિક કાર્યકરને વર્ષ૨૦૨૪-૨૫ માટે ‘ગુજરાત મહિલા વિકાસ પુરસ્કાર’ એનાયત કરવામાં આવશે. આ પુરસ્કાર માટે જે-તે જિલ્લા ખાતેના મહિલા અને બાળ અધિકારીશ્રી મારફતે નિયત નમૂનામાં શરતોને આધિન અરજીઓ મંગાવવામાં આવી છે.

ગુજરાત મહિલા વિકાસ પુરસ્કાર ઈચ્છુક સ્વૈચ્છિક સંસ્થા તેમજ સામાજિક કાર્યકર જે ઓછામાં ઓછા છેલ્લા ૧૦ વર્ષથી ગુજરાત રાજ્યમાં મહિલા કલ્યાણ ક્ષેત્રે, મહિલાઓના સામાજીક-આર્થિક સશક્તિકરણને લગતી પ્રવૃત્તિ કરતી હોય તેવી સ્વૈચ્છિક સંસ્થા તેમજ તેવાં મહિલા સામાજિક કાર્યકર પુરસ્કાર મેળવવા માટે જરુરી આધાર પુરાવા સાથે અરજી કરી શકશે.કોઈપણ સરકારી અથવા તો અર્ધ સરકારી અને ૧૦૦ ટકા સરકારી અનુદાનથી ચાલતી સંસ્થા આ પુરસ્કાર માટે અરજી કરી શકશે નહિ.ગુજરાત મહિલા વિકાસ પુરસ્કાર મેળવવા અંગેનું અરજી પત્રક મહિલા અને બાળ વિકાસ વિભાગની વેબસાઈટ www.wcd.gujarat.gov.in ઉપરથી ડાઉનલોડ કરી શકશે. તેમજ જે-તે જિલ્લા ખાતે જિલ્લા મહિલા અને બાળ અધિકારીશ્રીની કચેરી ખાતે મળી શકશે.

ગુજરાત મહિલા વિકાસ પુરસ્કાર સ્વૈચ્છીક સંસ્થા અને સામાજિક કાર્યકરને એક જ વખત મળવાપાત્ર છે. પુરસ્કાર માટે પસંદગી, પદ્ધતિ, શરતોમાં ફેરફાર કરવાની સંપૂર્ણ સતા રાજ્ય સરકારની રહેશે. પુરસ્કાર આપવા અંગે રાજ્ય સરકારનો નિર્ણય આખરી રહેશે.આ નિયત અરજી પત્રકમાં દર્શાવેલ વિગતો કાળજીપૂર્વક વાંચીને નિયત શરતો મુજબ જરુરી આધાર પુરાવા સહિત અરજી જાહેરાત પ્રસિદ્ધ થયાથી તા.૩૦.૧૧.૨૦૨૪ સુધીમાં સંબંધકર્તા સ્વૈચ્છીક સંસ્થા અને સામાજિક કાર્યકરએ જિલ્લા મહિલા અને બાળ અધિકારીશ્રીની કચેરી અમરેલીમાં મળે તે રીતે ફરજીયાત આર.પી.એ.ડી થી મોકલી આપવાની રહેશે તેમ અમરેલી જિલ્લા મહિલા અને બાળ અધિકારીશ્રીએ એક યાદીમાં જણાવ્યું છે.