દુબઇ બીએપીએસ સ્વામિ.મંદિરે રાજકોટ સિવિલ હોસ્પિટલને ૨૨ મેટ્રિક ટન ઓક્સિજન લિક્વિડ ટેન્કર મોકલ્યું

કોરોનાની વૈશ્વિક મહામારી દરમિયાન અનેક સેવાભાવી સંસ્થાઓ આગળ આવી સરકારને મદદરૂપ બને છે. તેવામાં બીએપીએસ સ્વામિનારાયણ સંસ્થા પણ બાકાત નથી. અત્યાર સુધી બીએપીએસ સ્વામિનારાયણ સંસ્થા દ્વારા ફૂડ પેકેટ, ફૂડ ડીસીઝ સેવા પૂરી પાડવામાં આવી છે. જ્યારે કે બીજી ઘાતક લહેરમાં ઓક્સિજન અને બેડની અછત વચ્ચે કોવિડ કેર સેન્ટર તેમજ ઓક્સિજન સેવા પૂરી પાડવામાં આવી છે. આજે દુબઇથી મંગાવી ખાસ રાજકોટ સિવિલ હોસ્પિટલ ખાતે ૨૨ મેટ્રિક ટન ઓક્સિજન લિક્વિડ ટેન્કરની ફાળવણી કરવામાં આવી છે.

રાજકોટ બીએપીએસ સ્વામિનારાયણ સંસ્થાના અપૂર્વ મુની સ્વામીએ જણાવ્યું હતું કે, બીએપીએસ સંસ્થા હોસ્પિટલ સેવા સાથે ફૂડ પેકેટ, ફૂડ ડીસીઝ અને બીજી ઘાતક લહેરમાં ખાસ ઓક્સિજન લિક્વિડ સેવા પૂરી પાડવામાં આવી છે. આજે દુબઇ ખાતે બની રહેલા મંદિર ટ્રસ્ટ દ્વારા ખાસ ઓક્સિજન લિક્વિડ ટેન્કર મોકલવામાં આવ્યું છે જે ૨૨ મેટ્રિક ટન ઓક્સિજન ટેન્કરની પૂજન વિધિ કરી બાદમાં રાજકોટ સિવિલ હોસ્પિટલને આપવામાં આવેલ છે. આ તકે રાજકોટ બીએપીએસ સંસ્થાના સંતો તથા રાજકોટના મેયર ડો. પ્રદિપ ડવ, એડિશનલ કલેક્ટર પરિમલ પંડ્યા તેમજ સિવિલ હોસ્પિટલના આરએમઓ સહિતના અધિકારીઓ ઉપસ્થિત રહ્યા હતા.