ભાજપના નેતાએ કલેક્ટરને ખખડાવ્યા, ‘તમે મોરબીને કોરોનામાં ધકેલી દીધું છે’

કોરોના સામેની લડાઈમાં મોરબી જિલ્લા વહીવટી તંત્ર ઊંઘતું ઝડપાયુ છે. ત્યારે ગઈકાલે પૂર્વ ધારાસભ્ય કાન્તિ અમૃતિયાએ સિવિલ હોસ્પિટલના ઇન્સ્પેક્શનમાં આવેલા જિલ્લા કલેકટર સાથે ઉગ્ર બનીને રજુઆત કર્યા બાદ આજે મોરબી શહેર ભાજપ અનુસૂચિત જાતિ મોરચાના પ્રમુખ બાબુ પરમારે કલેકટર સાથે ઉગ્ર અવાજમાં તડાફડી બોલાવી હતી અને ‘તમે જ મોરબી જિલ્લાને કોરોનામાં ધકેલી દીધો’ હોવાનું જણાવતા કલેકટર અડધી રજૂઆત સાંભળતાં જ ચાલતા થયા હતા. આ સમગ્ર ઘટનાનો વિડીયો સોશિયલ મીડિયામાં વાયરલ થયો છે.

મોરબી શહેર ભાજપ અનુજાતિ મોરચાના પ્રમુખ બાબુ પરમાર આજે કોરોના ટેસ્ટ વધારવા અને ખાનગી હોસ્પિટલમાં જામતી ભીડ ઓછી કરવા રજૂઆત માટે જિલ્લા કલેકટરને રૂબરૂ મળ્યા હતા. ત્યારે કલેકટરે કીટ મંગાવી છે આવી જશે તેવો જવાબ આપતા બાબુ પરમાર તાડુક્યા હતા અને કલેકટર તંત્રની બરાબરની ઝાટકણી કાઢી હતી.

આ સમગ્ર ઘટનાનો કોઈએ વિડીયો ઉતારી વાયરલ કર્યો છે. જેમાં ભાજપ અગ્રણી બાબુ પરમારના ઉપરા છાપરી સવાલોનો જવાબ જિલ્લા કલેકટર આપી શકતા નથી. આ રજૂઆતમાં ભાજપ અગ્રણી બાબુ પરમાર સ્પષ્ટપણે કહેતા જણાય છે કે, ભાજપ સરકાર કરોડો રૂપિયા કોરોના માટે ફાળવે છે પણ તમે આયોજન કરી શકતા નથી. મોરબીમાં કોરોના માટે તંત્રએ કોઈ આગોતરી તૈયારી ન કરી હોવાથી અત્યારે આ સ્થિતિ ઉદભવી હોવાનું જણાવી ઉગ્ર રજુઆત કરતા છેલ્લે જિલ્લા કલેકટર રજુઆત સાંભળ્યા વગર જ ચાલતી પકડી રવાના થયા હતા.

આ મામલે બાબુ પરમારે જણાવ્યું હતું કે, જાે ટૂંક સમયમાં રજૂઆતને પરિણામ ન મળે તો ગાંધીનગર જઈ રજૂઆત કરાશે. આજની રજૂઆતમાં બાબુ સાથે જિલ્લા અનુ.જાતિ મોરચાના પ્રમુખ વિઠલ ચાવડા, કાઉન્સિલર મનુ સારેસા, ઉપપ્રમુખ રવિ ધૂમલ, શહેર ભાજપ અ.જા. મહામંત્રી ધર્મેશ મકવાણા, સામાજિક અગ્રણી દીપક ચૌહાણ, રાજન પુરબીયા અને મહેશ સોલંકી વગેરે સાથે રહ્યા હતા.