સાવરકુંડલા મુકામે પૂ.સ્વામી નિર્દોષાનંદજી સત્સંગ આશ્રમમાં ગુરૂપૂર્ણિમા મહોત્સવ તેમજ પુસ્તક વિમોચન સમારોહ તથા મહારક્તદાન કેમ્પનો ત્રિવિધ કાર્યક્રમો યોજાશે

ભારતીય અને હિન્દુ સંસ્કૃતિમાં સદ્‍ગુરૂનું એક અદ્વિતીય સ્થાન રહેલું છે. જ્ઞાનદાતા માનવને પરમાત્માનાં પંથ પર અગ્રસર કરવાવાળા અને મોક્ષ પ્રદાન કરવાવાળા સદ્‍ગુરૂના ઋણમાંથી શિષ્ય મુક્ત થઈ શકતો નથી. આવા સદ્‍ગુરૂનું પૂજન અર્ચન કરી સદ્ઉપદેશ પ્રાપ્ત કરવાનો પવિત્ર પર્વ અટલે ગુરુ પૂર્ણિમા પર્વ. સૌરાષ્ટ્રની ધરાને શિવભક્તિ અને માનવસેવા જેવા ઉચ્ચ આદર્શો પ્રદાન કરવાવાળા અને ત્યાગ-વૈરાગ્યમય પવિત્ર સંન્યાસ જીવન જીવી બતાવનારા સંતવર્ય પૂજ્યપાદ સ્વામી નિર્દોષાનંદ સરસ્વતી મહારાજનું નામ આજે પણ સંત સમાજમાં ખૂબ આદરણીય ગણાય છે.

            ભાવનગર જિલ્લાના ટીંબી ગામે પૂજ્ય શ્રી દ્વારા પ્રસ્થાપિત સ્વામી નિર્દોષાનંદજી માનવસેવા હોસ્પિટલ પૂજ્યશ્રીની માનવસેવાની પવિત્ર ભાવનાનું મૂર્તિમંત સ્વરૂપ જ ગણી શકાય કે જ્યાં આવનાર પ્રત્યેક દર્દી નારાયણની તદ્દન વિનામૂલ્યે તમામ પ્રકારની આરોગ્ય સેવા કરવામાં આવે છે. પૂજ્યશ્રીની સંતપરંપરા માં પ્રતિવર્ષ ગુરૂપૂર્ણિમા મહોત્સવ ખૂબ જ ભક્તિભાવપૂર્વક ભવ્યતાથી ઉજવવામાં આવે છે. પૂજ્યશ્રીનાં સદ્શિષ્ય સ્વામી ભોલાનંદ સરસ્વતીજી મહારાજ તથા સ્વામી સદાનંદ સરસ્વતીજી મહારાજ ની અધ્યક્ષતામાં સત્સંગી સેવક સમુદાય દ્વારા વિવિધ આશ્રમોમાં ઉજવાતા મહોત્સવ ના અનુક્રમે આ વર્ષે આગામી તારીખ 03/07/2023 ને સોમવારના રોજ ગુરૂપૂર્ણિમા મહોત્સવ તથા સ્વામી ભોલાનંદજી દ્વારા લિખિત ત્રણ પુસ્તકો પ્રભુપ્રાપ્તિનાં પંથે, સદ્‍વિચાર રત્નાકર અને મૌન મંથનનું ભવ્ય વિમોચન અને સાથોસાથ વિનામૂલ્યે ચાલતી ટીંબી હોસ્પિટલના લાભાર્થે રક્તદાન કેમ્પનું આયોજન સાવરકુંડલા આશ્રમે કરવામાં આવેલ છે.

   આ મહોત્સવ સવારે નવ કલાકે ગુરૂજીની પ્રતિમાની પૂજન વિધિ થશે. ત્યારબાદ 9:30 કલાકે સ્વામી સદાનંદજીનુ દિવ્ય પ્રવચન. 10 કલાકે પુસ્તકોનું વિમોચન તથા સ્વામી ભોલાનંદજીનું ગુરૂભક્તિમય પ્રવચન થશે. 11:45 કલાકે મહાનુભાવોનું સન્માન અને પ્રસંગોચિત વક્તવ્યો થશે. 12:30 કલાકે તમામ મહેમાનો તથા સર્વે ધર્મપ્રેમીજનોને ભાઈઓ બહેનો બાળકોને સમૂહ ભોજન મહાપ્રસાદ. આ પ્રસંગે સ્વામી નિર્દોષાનંદજી પ્રકાશન અને સેવા મંદિર સાવરકુંડલા દ્વારા પ્રકાશિત નવા પુસ્તકો, કેલેન્ડર, રુદ્રાક્ષ માળા તેમજ અન્ય સાહિત્ય સ્ટોલ પરથી ઉપલબ્ધ થઈ શકશે. તંદુરસ્ત યુવા રક્તદાતા ભાઈઓ બહેનોને રક્તદાન કરવા માટે પધારવા સહદય આમંત્રણ પાઠવવામાં આવે છે. રક્તદાતાઓને આકર્ષક ગિફ્ટ પણ આપવામાં આવશે. આ સમગ્ર મહોત્સવનું લાઈવ પ્રસારણ આશ્રમની યુટ્યુબ ચેનલ GuruSannidhya (ગુરુ સાન્નિધ્ય) પર બતાવવામાં આવશે. ધર્મ, સેવા અને ગુરૂભક્તિમય મહોત્સવમાં પધારવા માટે તમામ ધર્મપ્રેમી જનતા-જનાર્દનને ભાવભર્યું આમંત્રણ છે. મહોત્સવનું શુભ સ્થળ સ્વામી નિર્દોષાનંદજી સત્સંગ આશ્રમ, કથીરિયાની વાડીમાં કલ્યાણ સોસાયટી, નવા બસ સ્ટેન્ડ પાછળ, સાવરકુંડલા જી.અમરેલી ખાતે યોજાશે…