અમરેલી

તા.૨૩ તથા ૨૪ ઓગસ્ટે અમરેલી ખાતે યોજાશે જિલ્લા કક્ષા કલા મહાકુંભ સ્પર્ધા

અમરેલી, તા.૧૯ ઓગસ્ટ, ૨૦૨૫ (મંગળવાર) અમરેલી ખાતે તા.૨૩ તથા તા.૨૪ ઓગસ્ટ, ૨૦૨૫ના રોજ જિલ્લા કક્ષા કલા મહાકુંભ સ્પર્ધા યોજાશે. જેમાં તાલુકા કક્ષાએ પ્રથમ વિજેતા થનાર અને જિલ્લા કક્ષાની સ્પર્ધામાં સીધી એન્ટ્રી કરનાર સહિતના સ્પર્ધકો ભાગ લેશે.

યુવક સેવા અને સાંસ્કૃતિક પ્રવૃત્તિઓના ઉપક્રમે અમરેલી જિલ્લા યુવા વિકાસ કચેરી અને અમરેલી જિલ્લા યુવા અને સાંસ્કૃતિક પ્રવૃત્તિઓની કચેરી દ્વારા અમરેલી સિવિલ હોસ્પિટલ સામે છે તે શ્રી કે.કે. પારેખ અને મહેતા આર. પી. વિદ્યાલય ખાતે તા.૨૩ ઓગસ્ટ, ૨૦૨૫ને શનિવારના રોજ સવારે ૯.૩૦ કલાકેથી લોકનૃત્ય, રાસ, સમૂહગીત, ભરતનાટ્યમ, શાસ્ત્રીય કંઠ્ય સંગીત (હિન્દુસ્તાની), લગ્નગીત, લોકવાર્તા, કાવ્યલેખન,ગઝલ શાયરી, ઓર્ગન, હાર્મોનિયમ, ચિત્રકલા અને સુગમ સંગીત સહિત વિવિધ સ્પર્ધા યોજાશે.

તા.૨૪ ઓગસ્ટ,૨૦૨૫ રવિવારના રોજ સવારે ૯.૩૦ કલાકે ક્રમશ: ગરબા, એકપાત્રીય અભિનય, કથ્થક,  લોકગીત, ભજન, દોહા છંદ ચોપાઈ, તબલા, નિબંધ, વકૃત્વ અને સર્જનાત્મક કામગીરી, સ્કૂલ બેન્ડ સ્પર્ધા યોજાશે.

અમરેલી જિલ્લા કક્ષા કલા મહાકુંભમાં વિવિધ ૨૩ જેટલી કૃતિઓનું આયોજન છે. તાલુકા કક્ષાએ પ્રથમ વિજેતા કલાકાર અને સીધી જિલ્લા કક્ષાની સ્પર્ધામાં એન્ટ્રી કરી હોય તે સ્પર્ધક કલાકારને આ સ્પર્ધામાં ઉપસ્થિત રહેવું. આ અંગે વધુ વિગતો અને જાણકારી માટે અમરેલી જિલ્લા યુવા વિકાસ કચેરીનો સંપર્ક કરવો તેમ અમરેલી જિલ્લા યુવા વિકાસ અધિકારીશ્રીએ એક યાદીમાં જણાવ્યું છે

Related Posts