આજે સમગ્ર દેશમાં મહાશિવરાત્રીના પર્વની હર્ષોલ્લાસ સાથે ઉજવણી કરવામાં આવી રહી છે, ત્યારે સાવરકુંડલા ખાતે માનવતા અને કોમી એકતાના અદભૂત દ્રશ્યો જોવા મળ્યા હતા. અહીં સ્થિત પૂજ્ય નિર્દોષાનંદ સ્વામીના આશ્રમ ખાતે દર્શનાર્થે ઉમટી પડેલા હજારો શ્રદ્ધાળુઓ માટે મુસ્લિમ સમાજના અગ્રણીઓ દ્વારા ઠંડા શરબતની સેવા પૂરી પાડીને સામાજિક સૌહાર્દનું ઉત્કૃષ્ટ ઉદાહરણ પૂરું પાડવામાં આવ્યું હતું.
મહાશિવરાત્રી નિમિત્તે વહેલી સવારથી જ નિર્દોષાનંદ સ્વામીના આશ્રમમાં શિવાલયના દર્શન માટે ભક્તોની ભારે ભીડ જોવા મળી હતી. આ આકરા તાપમાં દર્શનાર્થીઓને હાલાકી ન પડે તે હેતુથી મુસ્લિમ સમાજના આગેવાનો અને યુવાનો આગળ આવ્યા હતા. શિવભક્તોને ઠંડુ શરબત પીવડાવીને તેઓએ ‘જીવ અને શિવ’ ના સામીપ્યને ખરા અર્થમાં સાર્થક કર્યું હતું.
ગંગા-જમના તહેઝીબના દર્શન
આ પ્રસંગે ઉપસ્થિત અગ્રણીઓએ જણાવ્યું હતું કે, તહેવારો એ માત્ર ધાર્મિક વિધિ નથી પરંતુ પરસ્પર પ્રેમ અને ભાઈચારો વધારવાની તક છે. આશ્રમમાં આવતા દરેક શ્રદ્ધાળુનું સ્મિત સાથે સ્વાગત કરી, તેમને શરબત અર્પણ કરતી વખતે મુસ્લિમ અગ્રણીઓના ચહેરા પર એક અલગ જ સંતોષ જોવા મળતો હતો. આ દ્રશ્યોએ સાવરકુંડલાની વર્ષો જૂની સમરસતાની પરંપરાને વધુ વેગવંત બનાવી છે.
આશ્રમમાં આવેલા ભક્તો અને સ્થાનિક નગરજનોએ મુસ્લિમ સમાજની આ પહેલને મુક્ત કંઠે વધાવી લીધી હતી. લોકોમાં એવી ચર્ચા હતી કે જ્યાં પ્રેમ અને સેવા હોય છે ત્યાં ધર્મના વાડાઓ આપોઆપ ઓગળી જાય છે. આ અદભૂત સમન્વયે સાબિત કરી દીધું છે કે માનવતા એ જ સૌથી મોટો ધર્મ છે.
Recent Comments