સાવરકુંડલાની સરકારી હોસ્પિટલને બ્લડ બેંકની મંજૂરી: ગરીબ દર્દીઓ માટે આરોગ્ય સેવાઓમાં ક્રાંતિ, ધારાસભ્ય મહેશ કસવાલાની સતત મહેનત અને આરોગ્ય પ્રત્યેની નિષ્ઠાનો પરિણામ

સાવરકુંડલા અને આસપાસના વિસ્તારો માટે એક સુખદ અને ઐતિહાસિક સમાચાર
આવ્યા છે. હવે સાવરકુંડલાની સરકારી હોસ્પિટલને સત્તાવાર રીતે બ્લડ બેંકની
માન્યતા મળી છે. આ નિર્ણય ગરીબ અને જરૂરિયાતમંદ દર્દીઓ માટે આરોગ્ય ક્ષેત્રે
એક મોટી ઉપલબ્ધિ સાબિત થશે.
લાંબા સમયથી ચાલી રહેલી આ માંગણી હવે વાસ્તવિકતા બની છે, જેનો સીધો
લાભ ગરીબ દર્દીઓને મળશે જેમને ઇમરજન્સી સમયે કે ઓપરેશન દરમિયાન
લોહી માટે અન્ય શહેરોમાં જવું પડતું હતું. બ્લડ બેંકની સ્થાપના થવાથી હવે
તાત્કાલિક અને જીવનરક્ષક લોહીની સુવિધા સ્થાનિક સ્તરે જ ઉપલબ્ધ થશે.
આ સફળતાનો યશ સાવરકુંડલાના ધારાસભ્ય શ્રી મહેશ કસવાલાની અથાક મહેનત
અને આરોગ્ય પ્રત્યેની તેમની નિષ્ઠાને જાય છે. તેમણે આ મુદ્દાને કેન્દ્ર અને રાજ્ય

સરકાર સમક્ષ વારંવાર રજૂ કર્યો, જેના પરિણામે આ મંજૂરી મળી છે. શ્રી
કસવાલાએ આ મહત્ત્વપૂર્ણ ઉપલબ્ધિ બદલ રાજ્ય અને કેન્દ્ર સરકારનો હૃદયપૂર્વક
આભાર વ્યક્ત કર્યો છે.
આ નવી સુવિધા ગરીબ પરિવારો માટે એક આશીર્વાદરૂપ પગલું છે, કારણ કે હવે
તેમને લોહીની જરૂરિયાત માટે મોંઘી ખાનગી હોસ્પિટલો કે દૂરના શહેરોમાં જવાનો
ખર્ચ અને મુશ્કેલી સહન કરવી પડશે નહીં. સાવરકુંડલાની સરકારી હોસ્પિટલમાં જ
બ્લડ બેંકની સુવિધા મળવાથી આરોગ્ય સેવાઓ વધુ સુલભ અને અસરકારક
બનશે, જેનાથી અનેક જીવન બચાવી શકાશે.
આ નિર્ણયથી સમગ્ર સાવરકુંડલા અને લીલીયા વિસ્તારના આરોગ્ય ક્ષેત્રમાં એક
નવો અધ્યાય શરૂ થયો છે તેમ સત્વ અટલધારા કાર્યાલયના ઇન્ચાર્જ જે.પી.
હીરપરાએ અખબારી યાદીમાં જણાવ્યું છે.