૭૩મા જન્મદિને કંગનાએ પાઠવેલી શુભેચ્છા બદલ વડાપ્રધાને કંગનાનો આભાર માન્યો

વડાપ્રધાન નરેન્દ્ર મોદીનો ૭૩મો જન્મદિવસ દેશભરમાં ઉજવાયો હતો. અનેક પ્રકારના સેવાકાર્યોની સાથે લાખો-કરોડો લોકોએ વડાપ્રધાનને શુભેચ્છા પણ પાઠવી હતી. સોશિયલ મીડિયા પર વડાપ્રધાન માટે શુભેચ્છાનો વરસાદ વરસી રહ્યો છે. કંગના રણોતે જન્મદિવસ નિમિત્તે શુભેચ્છા આપતી વખતે વડાપ્રધાનની સરખામણી ભગવાન શ્રીરામ સાથે કરી હતી. વડાપ્રધાન નરેન્દ્ર મોદીના જન્મદિન પર કંગના રણોતે એક્સ એટલે કે ટિ્‌વટર પર પોસ્ટ શેર કરી હતી. કંગનાએ વડાપ્રધાનનો ફોટોગ્રાફ શેર કરવાની સાથે તેમને બર્થ ડે વિશ પણ આપી હતી.

કંગનાએ પોતાની પોસ્ટમાં લખ્યુ હતું, આકરી મહેનત અને દૃઢ મનોબળ વડે સામાન્ય વ્યક્તિમાંથી નવા ભારતના ઘડવૈયા બનનારા અને દુનિયાના સૌથી વધુ માનીતા નેતાને જન્મદિવસની શુભેચ્છા. તમે માત્ર વડાપ્રધાન જ નથી, પરંતુ ભગવાન રામની જેમ આ દેશની ચેતનામાં તમારું નામ હંમેશા માટે અંકિત થઈ ગયું છે. તમારા લાંબા અને સ્વસ્થ જીવનની કામના કરુ છું. કંગના રણોતની પોસ્ટ પર વડાપ્રધાન નરેન્દ્ર મોદીએ પણ રીએક્શન આપ્યું હતું. તેમણે કંગનાનો આભાર માન્યો હતો. કંગનાની આ પોસ્ટને સોશિયલ મીડિયા પર મિશ્ર પ્રતિસાદ મળ્યો હતો. કંગના ઉપરાંત શાહરુખ ખાન, અમિતાભ, અક્ષય કુમાર, અનુપમ ખેર, શિલ્પા શેટ્ટી સહિત બોલિવૂડની અનેક સેલિબ્રિટીઝે વડાપ્રધાનને જન્મદિવસની શુભેચ્છા પાઠવી હતી.