રવી ઋતુ ૨૦૨૫-૨૦૨૬ – ઘઉંની ટેકાના ભાવે ખરીદીઃ ખેડૂતોએ ઓનલાઈન નોંધણી માટે ગ્રામ પંચાયતનો સંપર્ક કરવો

ખેડૂતોને તેમના ખેત ઉત્પાદનના પોષણક્ષમ ભાવ મળી રહે તે માટે રવી ઋતુ ૨૦૨૫-૨૬માં રાજ્ય સરકાર દ્વારા લઘુતમ ટેકાના ભાવે રુ.૨,૪૨૫ પ્રતિ ક્વીન્ટલ ઘઉંની ખરીદી ગુજરાત રાજ્ય નાગરિક પુરવઠા નિગમ લી. મારફતે કરવામાં આવશે.ઘુતમ ટેકાના ભાવે ઘઉંના વેચાણ કરવા ઇચ્છા ધરાવતા ખેડૂતોની ઓનલાઈન નોંધણી સમગ્ર રાજ્યમાં સ્થાનિક ગ્રામ્ય કક્ષાએ વી.સી.ઈ મારફતે ૦૧.૦૧.૨૦૨૫થી કરવામાં આવશે.નોંધણી માટે જરુરી પુરાવા જેવા કે, આધારકાર્ડની નકલ, અદ્યતન ગામ નમુનો ૭/૧૨, ૮ અ, ખેડૂતના બેંક ખાતાની વિગત જેમ કે, બેંક પાસબુકની નકલ અથવા કેન્સલ ચેકની નકલ સાથે લાવવી.

પાક લઘુતમ ટેકાના ભાવે વેચાણ કરવા ઇચ્છુક ખેડૂતોએ ગ્રામ પંચાયતનો સંપર્ક કરીને ફરજિયાત નોંધણી કરાવવાની રહેશે.નોંધણી કરાવતી વખતે તમામ ડોક્યુમેન્ટ સુવાચ્ય રીતે અપલોડ થાય તથા માગ્યા મુજબના જ હોય તેની કાળજી લેવી. ટેકાના ભાવે ખરીદી માટે રજિસ્ટ્રેશન કરાવેલ ખેડૂતોને એસ.એમ.એસ મારફત ખરીદી અંગેની જાણ કરવામાં આવશે.

ખેડૂતોએ ખરીદી સમયે પોતાનું આધારકાર્ડ, ઓળખપત્ર સાથે રાખવાનું રહેશે. બાયોમેટ્રીક ઓથેન્ટિકેશન દ્વારા જ ખેડૂત ખાતેદારના જથ્થાની ખરીદી કરવામાં આવશે.નોંધણી સમયે ખોટા ડોક્યુમેન્ટ અપલોડ કરવામાં આવશે તો અને તેવા કિસ્સામાં આપનો ક્રમ રદ કરવામાં આવશે.નોંધણી માટે કોઈ મુશ્કેલી જણાય તો હેલ્પલાઈન નં. ૮૫૧૧૧૭૧૭૧૮, ૮૫૧૧૧૭૧૭૧૯ પર સંપર્ક કરવાનો રહેશે તેમ ગુજરાત રાજ્ય નાગરિક પુરવઠા નિગમ લી. અમરેલીનાનાયબ જિલ્લા મેનેજરશ્રીએ  એક યાદીમાં જણાવ્યુ છે.