અમરેલી જિલ્લામાં કમોસમી વરસાદથી થયેલા નુકસાની માટે રાજ્ય સરકારશ્રી દ્વારા કૃષિ રાહત પેકેજ જાહેર આવ્યું છે. જેના માટે હાલ તમામ અમરેલી ગ્રામ પંચાયત અને શહેરી વિસ્તારમાં કૃષિ રાહત પેકેજનો લાભ લેવા માટે જોગવાઈ મુજબ વી.સી.ઈ મારફત નુકસાની થઈ હોય તેવા ખેડૂતોની અરજીઓ મેળવવાની કામગીરી તારીખ ૧૪.૧૧.૨૦૨૫ થી શરૂ થયેલી છે, જે આજ રોજ પૂર્ણ થવામાં છે. અત્યારસુધીમાં જિલ્લામાં ૨૫ હજારથી વધુ નુકસાનગ્રસ્ત ખેડૂતોને ૭૫ કરોડથી વધુની રકમ ડી.બી.ટી મારફત સીધી અરજદારના આધાર લિંક બેક ખાતામાં જમા કરી દેવામાં આવી છે અને જેમ જેમ અરજીઓનું વેરીફીકેશન થશે, તેમ ખેડૂતોને ચુકવણું કરવામાં આવી રહ્યું છે.
જિલ્લાના તમામ અસરગ્રસ્ત ૬૨૬ ગામોમાં ખેડૂતો દ્વારા આ અરજીઓ કરવામાં આવી છે. આજદિન સુધી સમગ્ર જિલ્લામાં એકંદર કુલ ૦૨ લાખ ૧૯ હજારથી વધુ અસરગ્રસ્ત ખેડૂતોએ પાક નુકસાનીની સહાયતા મેળવવા બદલ વી.સી.ઈ મારફત ઓનલાઇન અરજીઓ કરી છે.
આ અરજીઓમાં અરજદાર તરફથી રજૂ થયેલા સાધનિક ડોક્યુમેન્ટ અને વિગતોની ચકાસણીની કામગીરી ગ્રામસેવક અને તાલુકા સ્ટાફ મારફત કરવામાં આવી રહી છે. હાલના તબક્કે ૮૧ હજાર અરજીઓની ચકાસણી દિવસ-રાત કરવામાં આવી રહી છે.
રાજ્ય સરકાર ખેડૂતોના હિતાર્થે રૂ. ૧૦ હજાર કરોડનું કૃષિ રાહત પેકેજ જાહેર કર્યું છે અને રૂ. ૧૫ હજાર કરોડની ટેકાના ભાવે જણસોની ખરીદી કરવામાં આવી છે. જગતના તાતની પડખે સંવેદના રાખી રાજ્ય સરકારે આફતની ઘડીમાં બનતી ત્વરાએ રાહત સહાય પહોંચાડવા માટે પ્રયાસો કર્યા છે. જેમાં જિલ્લા વહીવટીતંત્રના અધિકારીશ્રીઓ અને કર્મયોગીઓએ સ્તુત્ય પ્રયાસ કર્યો છે તેમ જિલ્લા ખેતીવાડી વિભાગની એક યાદીમાં જણાવાયું છે.
Recent Comments